Commerce & Industries Minister-in insumdawn tawnna a tlawh

Commerce & Indus­tries minister Dr R Lal­thangliana chuan nimin zing khan Zokhaw­thara ramria insumdawn tawnna tura hnathawh mek a tlawh a, chhunah Champhai College-a Commerce building sak thar a hawng.

Dr R Lalthangliana chuan, ramri insum­dawn tawnnaah sorkarin mipui eizawn­na tibuai lo leh tikhaihlak lo tura hmalak a duh thu a sawi a, "Danin a phalte hmanga sumdawnna kalpui chu mipui zawm tur leh mawhphurhna a ni," a ti.

Zokhawthar Land Custom Station chu cheng nuai 1,500 hmang­in tihchangtlun mek a nih thu sawiin Minister chuan, "India rama inter­national border trade lian zawk kalpuina tur hmun 25 tun hnaia thlan zingah Zokhawthar leh Zorinpui a tel a, hengah hian border trade tihhmasawnna tur project lian tham zawk kalpui tum a ni," a ti a; Zokhawthar khawtlang hruaitute'n zirna ṭha leh changtlung zawk an mamawh thu an thlen chu en zui a tum thu a sawi.

Minister hian SASCI sum nuai 1,500 hmanga Land Custom Station tihchangtlun hna thawh mek chhunga thil chi hrang hrang thawh mekte chu tlo leh ṭha, ram tana ro tlinga siam tur leh hun tiam chhung ngeia zo turin contractor-te a chah.

Champhai South bialtu MLA TJ Lalnuntluanga pawhin thu sawiin, Zokhawthar panna kawng chhia siam nan SASCI aṭangin cheng nuai 1,350 dah a nih thu a sawi a, Ṭiau luia Mizoram leh Myanmar inkalpawhna lei siamna tur cheng vbc 22.50 hu project Mizoram PWD-in a siam tawh a, Road Transport & Highways minister Nitin Gadkari hnenah thlen a ni," a ti.

Champhai College building pakhat hawnnaah Higher & Technical Education minister Dr R Lalthangliana chuan, "Commerce zirna hawn hian kawngro thui tak a sû a ni," a ti a; zirlaite tan beidawn loh a pawimawh thu leh hlawhtling turin teirei peih, inthununna ṭha leh taimak a pawimawh thu a sawi.

Champhai College Commerce building sak thar hi Rastriya Uchhatar Shiksha Abhiyan 2.0 sum nuai 100 hmangin SkyRidge Construction & Consultancy Services-in an sa a ni.