Pangngai taka tui sem phût

PC party president Vanlalruata leh hruaitu dangte chuan nimin khan Greater Aizawl Water Supply Scheme (GAWSS) Phase-II an tlawh a, Aizawl veng hrang hrangah PHE tui sem a mumal loh avangin mipuiin tui harsatna naménlo an tâwk mek nia sawiin, a hun tak leh pangngai taka tui sem turin sorkar an ngen.

GAWSS-ah hian Tlawng tui kang vanga harsatna emaw, tui pump chhuahna tura khawl leh kawlphethaah emaw buaina a awm lo tih an hmuh thu an sawi a, "GAWSS Phase-II hian Aizawla chengte'n tuia harsatna kan tawh loh nan Tuikhuahtlanga tuizemah darkar 24 chhûng tui a supply reng zawk tih kan hmu. Hetih laia Aizawla chêngte'n PHE tui sem kan dawng mumal thei si lo hi, a semtute inthlahdah vang nge, sem dan mumal loh vang," an ti.