Mit enkawlnaa thawhho dan tur sawiho

Governor Dr Hari Babu Kambhampati hoin April 25, 2023 khan Raj Bhavan-ah LV Prasad Eye Institute, Health department, Zoram Medical College, National Health Mission, Synod Hospital leh Eye Care Hospital hotute'n thawhho dan tur an sawiho.

Dr Hari Babu Kambhampati chuan, Mizoramin mit enkawlna ṭha a mamawh nia a hriat thu sawiin, "Hmasawnna sang chho zelin a ken tel emaw tih turin mit lama harsatna tâwk an tam zel a, enkawlna lamah ṭan lak a ngai a, Mizoramah pawh mit lama harsatna tâwk tam tak an awm," a ti.

Mit harsatna neite'n a hun taka enkawlna ṭha an lak loh avangin mit a del phah foa a hriat thu sawiin Larsap chuan, "LV Prasad Eye Institute nen thawhhona ṭha a awm chuan Mizoram mipui zingah mit harsatna neite'n awlsam zawk leh senso tlem zawkin inenkawlna an nei thei dawn a ni," a ti a; LV Prasad Eye Institute-in Mizoramah an thiamna leh hmanruate chhawp thei se a duh thu a sawi.

LV Prasad Eye Institute dintu Dr GN Rao chuan, Mizoram nena thawhhona awm theih dan tur a sawifiah a, Mizoram sorkar leh damdawi-inte chu thawhhona ṭha an neih theih nan inhawng turin a sáwm.

Health secretary Esther Lalruatkimi, ZMC director Dr John Zohmingthanga, NHM mission director Dr Eric Zomawia, Synod Hospital aiawh Dr R Lalrindiki leh Eye Care Hospital hotu Dr KL Remsanga ten thu an sawi bawk.

Ṭhutkhawmah hian ophthalmologist, optometrist leh nurse training neihah te, khawl ṭha zawk neih theih dan turahte leh sikul naupangte mit enfiahahte thawhhona a awm thei nia an hriat thu an tarlang a ni.