Thorang biala khaw tin lirthei kawngin a pawh tawh - Zodintluanga

Congress Legislature Party leader Zodintluanga Ralte chuan nimin khan a bial Thorang constituency-a Lungsen North Branch YMA Hall a hawng a; Thorang bial chhunga khaw tin chu lirthei kawngin a pawh vek tawh thu a sawi.

Zodintluanga Ralte chuan, Lungsen North Branch YMA Hall ang chu Mizoram hmun dangah pawh a tam loh thu sawiin, hall din a nih theihna tura hma latute chungah lawmthu a sawi a, "Kan bial chhung khaw kilkhâwr ber berte pawh motor kawngin a pawh ta vek mai hi hmasawnna nasa tak a ni," a ti.

Thorang bialtu MLA a nih aṭangin Lungsenah hmasawnna tam tak a awm tih sawiin Zodintluanga chuan, "Zirna lama kan rualawhnate phuhrûk a ni a, matric exam centre leh higher secondary school-te a awm tawh a, tui kan harsatna sukiang tura tanky dah belh ngaite kan dah belh theite hi a lawmawm hle," a ti a; tui harsatna sukiang a, tui in tur hnianghnar a awm ta chu lawmawm a tih thu a sawi.

Zodintluanga Ralte chuan, YMA chu khawtlang innghahna a nih thu leh misual vanga rálkhêla an awm pawha khawtlang thlamuantu a nih thu a sawi a, "YMA zâwna kan hmalakna mipuiin kan thláwp ṭha hle ṭhin," a ti.

Congress party treasurer a nihna aṭanga a bàn chungchangah Zodintluanga chuan, Congress party a chhuahsan loh thu leh party dang a zawm lo a, ZPM a zawm ngai dawn loh thu a sawi bawk.

Lungsen North Branch YMA hi September 23, 1937-ah din a ni.