Kum 11 chhungin Mizorama thi zatah hmeichhia aiin mipa 18,933-in an tam
Directorate of Economics & Statistics chhinchhiah danin, kum 11 chhung, 2011 aṭanga 2021 chhung khan Mizoramah nau piang 2,61,707 an awm a, mi 70,545 thiin, hmeichhe thi aiin mipa thi 18,933-in an tam zawk.
Kum 2011 leh 2021 chhunga Mizorama nau piang zat Economics & Statistics chhinchhiah danin, kum 11 kal ta chhungin kum tin nau piang sing hnih chuang an awm ziah a, sing thum a la tling ngai lo.
Nau piang tam ber kum chu kum 2012 kha a ni a, mi 26,042 an piang. Kum 2012 aṭangin kum 2018 thleng nau piang zatin hniam lam a pan a, kum 2019 aṭangin pun lam a pan leh thung. Nau piangah hian kum tin hmeichhia aiin mipa an tam zawk a, chawhrualin, mipa 1,000 zelah hmeichhia 976 piang ang a ni.
Mizorama mitthi zatah pawh hmeichhia aiin mipa an tam zawk zel. Piang zatah mipa leh hmeichhe inkar a zauh vak loh laiin, thi zatah erawh chuan hmeichhia aiin mipa an tam zawk hle.
Kum 2011 aṭanga 2021 thlenga Mizorama mitthi zat chu 70,545 an ni a, mipa 44,739 leh hmeichhia 25,806 niin, hmeichhia aiin mipa 18,933-in an tam zawk. Kum 11 chhunga mipa thi zat hi thi zawng zawng aṭangin 63.42% a ni a, hmeichhe thi zat chu 36.58%% a ni.
Kum 11 chhunga kum riat chhung chu mipa thi zat 63% aia tam hret vek a ni a, kum 2011 leh 2019-ah 63% a tling lo a, kum 2017-ah 64.93% a tling thung.
Vanglaini chuan nizan khan Aijal Club-ah kum tina an buatsaih ṭhin Zoram Titi vawi 10-na an buatsaih a, thupui chu "Mizote'n ral lam kan pan em?' (Nau piang tlem leh Mizo mipa thi tam) tih a ni. Zoram Titi-ah hian Economics & Statistics director B Lalrinhlua'n an department record hrang hrang a tarlang a ni.
Vanglaini-in nizana Aijal Club-ah Zoram Titi vawi 10-na a buatsaihah Economics & Statistics director B Lalrinhlua'n an department record hrang hrang a tarlang.
Fa hrin zat
Economics & Statistics chhinchhiah danin, kum 2019-2020 chhung khan Mizoramah nupa tuak khatin fa an hrin zat chawhrual chu 1.9 a ni a, hei hian ram mihring zat a him reng theihna atana mithiamte'n nau hrin zat him tawka an ngaih a pha lo.
Kum 1992-1993 khan Mizoramah nupa tuak khatin fa an hrin zat chawhrual chu pahnih (2.3) a ni a, kum 1998-1999 khan pathum (2.9) niin, kum 2005-2006 ah pawh pathum (2.9) a ni. Kum 2015-2016 khan pahnih (2.3) a ni a, kum 2019-2020 ah pahnih (1.9) a ni.
Economics & Statistics director B Lalrinhlua chuan, mithiamte sawi danin, ram a him reng theih nan hmeichhiate'n kum 15-49 an nih chhungin fa pahnih aia tlem lo an hrin a ngai tih a nih thu a sawi a, "Hmeichhe pakhatin fa pahnih (2.1) chin chung lam an hrin hi ram mihring zat a dik zel theih nan a him a, chumi hnuai lam chu zàwi zâwia hnam ral hret hretna a ni. Kum 20/30 hnuah chuan putar an tam ang a, ṭhalai an tlem ang a, hna thawk tur an tlem dawn. Kum 50 vel a vei chuan kan ral titih mai dawnin a rin theih," a ti.
Thih chhan tam ber
Economics & Statistics hotute sawi danin, Mizorama mitthite thih chhan tam ber chu kum 2015 khan natna inkai chhàwn theih 'infectious and parasitic disease' (HIV/AIDS, septicemia, ngawr, sikserh, adt.) a ni.
Kum 2016 khan ei leh in avanga natna insiam 'digestive system disease' (ruihhlo, zû, vaihlo leh chhan dang vanga chaw kawng leh a kaihhnawih natna) vanga thihna a tam ber a, chu'ng zingah thin (liver) ṭhat loh vanga thihna a tam filawr. Kum 2017, 2018, 2019 leh 2021-ahte pawh digestive system disease vanga thihna a tam ber.
Covid-19 lèn ṭan kum 2020 khan ‘circulatory system disease’ (lung natna, thisen sang, stroke, adt.) vanga thihna a tam ber a; kum 2022-a thih chhan tam ber chu ruihhlo, zû, vaihlo leh chhan dang vanga chaw kawng leh a kaihhnawih natna a tam ber thung.
Directorate of Economics & Statistics hian Mizorama nau piang zat, mitthi zat leh thil dang chi hrang hrang an chhinchhiah ṭhin a, chu'ngte chu a bua siamin an tichhuak ṭhin. Piang zat leh thi zat hi sorkara inhriattir zat aṭanga lâk a ni a, inhriattir lo an awm thei bawk. Economics & Statistics kum 2022 chhunga piang zat leh thi zat pawh an la khawm tawh a, an la peihfel loh avangin tarlan tel theih a ni lo thung.
