Taxation-in target an khûm lawm a ni; Sum thàl chhuahah ṭan lâk a pawimawh - CM

Taxation department chuan nimin khan an auditorium-ah kum 2022-23 chhunga sorkara sum an chhùn luh tur zat an khûm an lawm a, chief minister Zoramthanga'n hmanpuiin, sorkar laipui aṭang sum lo kal state-in a do lêtna tur state-in sum a neih thu leh, sorkar laipui aṭanga sum thàl chhuahah ṭan lâk a pawimawh thu a sawi.

Taxation department hian sorkar kum liam tax 2022-23 khan chhiah an hmuh tura bituk (target) chu cheng vbc. 900 a ni a, chhiah an hmuh zat chu cheng vbc. 1,020.66 niin, cheng vbc. 120.62-in target an khûm a ni.

CM Zoramthanga chuan, Taxation department hlawhtlinna chu mi dang tan entawn tlak a nih thu leh chhiah lâk luhah ṭan lak zel a pawimawh thu a sawi a, "Hmasawnna hna thawhna tur chuan sorkar laipuiin development fund tam tak a kawl, project hmanga hâi chhuah tur neih a pawimawh. Chûng fund sanction chu state-in a lo do lêt vena tur chu state sum a awm a, a zuk thàl chhuah lamah ṭan lak a pawimawh a ni," a ti.

Mizoram sorkar sum dinhmun hriatthiam a pawimawh thu sawiin Zoramthanga chuan, "Hun pangngai chu ni se budget system ang chuan state-in hmasawnna hna awlsam taka a thawh theih laiin, hripui léng avangin budget pawh a lo innghah vek tawhna state sum hmuh tur hrêk a ni," a ti a; sum hnâr dangte bakah sum hmuhna tura innghahna lian ber share of taxes a tlakhniam thu a sawi.

Chief Minister chuan, share of taxes a tlakhniam avanga Mizoramin sum a hmuh tur a hmuh loh chu cheng vbc. 3,000 aia tam a nih a rin thu a sawi a, "Sum kan hloh hi tun thlengin rulhna hmuh lêt a awm loh avangin hripui léng boruak a ziaawm hnuah pawh sum harsatna a la inzui zel a ni," a ti.

Taxation minister Lalchamliana chuan ṭan la zel turin thawktute a chah a, "Contractor-te GST pe lo an awm tih thu newspaper report-a hmuh tur a awmte hi ṭan lak ngaihna a ni. GST-a inziak lut àwm, inziak lut lo sawi tur an awm ṭhin a, heng hian awareness lama hmalak a ṭulna a tilang," a ti a; mipuiin an mawhphurhna an hriat a pawimawh thu a sawi.

Lalchamliana chuan, district thar pathumah Taxation office nei tura hmalak mek a nih thu te, district eng emaw zatah office tihchangtlun ngai a awm thu te, state sum dinhmunin a zir chuan hmasawnna atan state changkang zawkte tih dan zir tura intirh a, hlâwk zawka thawh leh phûrna thar a thlen ngei a beisei thute a sawi bawk.

Inkhawmah hian Taxation secretary Vanlal Chhuanga, commissioner of state tax R Zosiamliana leh mi pawimawh dangte pawhin thu an sawi.