MNF chhuahsan tumna ka nei lo - Rinliana : CM leh RRR-a te an insiam tawn a ring lo

Assembly speaker Lalrinliana Sailo chuan, MNF chhuahsan tumna a neih loh thu leh chief minister Zoramthanga leh minister of state Robert Romawia Royte te insiam tawna eptute'n an puhna chu thu dik a nih a rin loh thu a sawi.

USA-a zin Lalrinliana Sailo hi nimin khan Mizoramah a rawn haw a, Lengpui Airport-ah thuthar thehdarhtute'n an lo kâwm. Zawhna chhángin, MNF chhuahsan tumna a thinlungah a awm loh thu a sawi a, "Kan CM hi hruaitu ṭha leh zui tlâkah ngaiin MNF-ah kan lut. Opposition-te'n min sawichhiatsak nasa a, party angin kan chhan hneh lo. Chhantu a nei lo chu ka ti lo a, kan chhan zo lo hle," a ti.

CM Zoramthanga chu dik taka thawk leh Pathianmi hmuha a hmuh thu sawiin Rinliana Sailo chuan, "Pawi em em mai chu Pu Robert Romawia Royte duhsak bik a, central-ah project nawrpuia insiam tawn angah eptute'n an puh. Hei hi mipuiin a dikah an ngai deuh ṭhupin ka hria," a ti a, ani erawh chuan thu dik a nih a rin loh thu a sawi.

Lalrinliana Sailo chuan, MNF chhuahsan tumna thinlung a neih loh thu a sawi rualin, eptute'n an puh anga eirûkna laka fihlim lo leader an nei a nih chuan zui reng thu a awm lo tih sawiin, "Kei chuan kan leader hi a corupt-in ka ring lo. MNF-ah hian chhantu a nei lo ṭhinin ka hria. USA-a kan titi a chhuah hnuah MNF kan ṭangrual em em a, party member tam ber kan nih avangin kan sorkar leh mai turah ka ngai," a ti.

USA-a a thusawi social media lama darhah sawi sual a neih a hriat loh thu sawiin Lalrinliana chuan, "Kan ram tana ṭha tur nia ka hriatte ka sawi. Video lang zingah erawh kan nau pakhatin ka zawhna a chhàn sual deuh a awm a, a in sakna atana senso tawh zat ka zawt emaw a tih kha a ni mai," a ti a; a sawite chu ram tana ṭha tura a hriatte a nih thu a sawi.

BJP-a luh a tum leh tum loh zawhna chhangin Lalrinliana Sailo chuan, "BJP hi NDA-ah MNF anga kan thawhpui sa an ni a, an ṭhatna lai a awm. Kohhrante'n a him lo deuh lai a awm em aw an tihna lai pawh a awm tho. Sorkar kalphungah chuan an ṭha em em," a ti a; BJP zawm tur chuan Mizoram tan a man pawh a to viaua a rin thu a sawi bawk.