Electrical Safety Day hman a ni; PE dept-in revenue target 22%-in an khûm
Power & Electricity department chuan nimin khan Bawngkawn South Cultural Centre-ah Electrical Safety Day an hmang a, Power & Electricity minister R Lalzirliana'n a hmanpui. PE department hian kum 2022-23 chhunga an target cheng vbc. 600 chu vbc. 137 (22%)-in an khûm a ni.
R Lalzirliana chuan, PE department chu kawlphetha kaihhnawiha mawhphurtu an nih thu sawiin, "A pek chhuahna piah lamah invên fimkhurna lamah pawh thawktu zawng zawngte'n tih tak zeta hun, thâ leh rilru kan sèn a ṭul," a ti a; Indian Electricity Rules bakah, dan leh inkaihhruaina dangte hre chiang bertu an nih avangin uar zawka puangzar ṭhin turin a chah.
Kawlphetha kal sual vanga kum tina in leh lo chán an awm ṭhin chu pawi a tih thu sawiin Minister chuan, "Awareness kan mamawh tak zet a, awareness bakah fimkhurna leh himna chungchanga safety standard kan zawm a pawimawh. Thil pawi thleng palh thei nia kan hriat rêng rêng chu pawi a thlen hmaa action kan lak vat pawh a ṭul," a ti a; department chhungah pawh inenfiah a, tih tak zeta fimkhurna leh himna chungchang inzirtir uar a ṭul thu a sawi.
Kum 2022-23 chhunga PE department sum a thawh chhuah tura Finance department-in a tuk (revenue target) chu cheng vbc. 600 a ni a, PE department chuan cheng vbc. 737 thawk chhuakin, 22%-in target an khûm a ni. Joint Electricity Regulatory Commission (JERC)-in kum 2022-23 chhunga revenue target an siamsak chu cheng vbc. 403 a ni thung.
Electrical Safety Day hmannaah hian Mizoram sorkar sum báwma sum chhùng lut tam te, transmission lama kawlpetha hlohna tihtlem - Aggregate Technical & Commercial Loss (ATC Loss) leh transformer venhim lama thawk ṭhate hnenah lawmman hlan a ni.
Sorkara sum chhûng lut tam ber chu Revenue Sub-Division-II, Aizawl niin, cheng vbc 157.77 an thawk chhuak a; ATC Loss tihtlemnaa thawk ṭha ber chu Champhai Rural Sub-Division niin, ATC Loss chu 7.46% a ni.
Transformer venhim lama thawk ṭha berte chu - Distribution Division-I Aizawl South, Distribution Division-III Aizawl Central, Revenue Division-I Aizawl North, Tuipang-V Power Sub-Division leh Maicham Hydel Project Sub-Division, North Vanlaiphai te an ni.