KHAWTHLIR

Sikul tlawh chhuak

YMA, Maubawk Branch chuan nimin khan YMA kumpuan 'Ram leh hnam humhalh' bawhzui nan an venga zirna-in, primary school aṭanga high school-te an tlawh a; zirna pawimawhzia te, Zo nun ze mawi leh aia upa zah chungchang te, thianghlimna leh ruihhlo laka fihlim chungchangte an hrilh a ni.

Tanpuina hlàn

Governor Discretionary Fund aṭangin Siaha district-a home pali - Kalvari Healing Ministry, Agape Home, Grace Children's Home leh Salvation Orphanage Boys' Home hnenah ṭanpuina Rs 25,000 theuh pek a ni. Ṭanpuina hi Larsap aiawhin Siaha DC Lalhmunsanga Hnamte-in April 27, 2023 khan home pali hnenah a hlàn.

MLA-in hmanpui

Thorang bialtu MLA Zodintluanga Ralte chuan nimin khan a bial chhunga Lungsen Zone Volleyball Association buatsaih MLA CUP Volleyball Tournament 2023 khàrna Lungsen GSA Playground-ah a hmanpui. MLA chuan, ṭhalaite'n an ṭhat lai hun an chen Pathianin a phalsak rualin, an chungah rorelna a la awm dawn tih hre reng turin ṭhalaite a chah a, "Ṭha taka kan ṭhat lai hun hmang turin ka duhsak che u," a ti.

Zawhna siam zirtir

Mizoram Board of School Education chuan nimin khan Lawngtlaia Don Bosco School Hall-ah Lawngtlai district-a high school leh higher secondary school zirtirtute tan zawhna siam dan inzirtirna an buatsaih a, thupui chu Capacity building of teachers in setting higher order thinking skills (HOTS) question tih a ni.

Political session

ZPM party chuan nimin khan an pisaah political session an nei a, AMC ward-XVI bialtu corporator R Lalawmpuii'n thu sawiin, mi tinin mahni phâk tâwk ṭheuhah politics ngaihven a ṭul thu sawiin, "Tunah chuan ṭhalai, nu leh pa leh pitar putar thlengin politics kan ngaihven ta hle niin a lang a, kan hmasawnna ropui tak a ni," a ti a; hmeichhiate khawtlang leh ram rorelnaah an lang chho ve ta zel chu lawmawm a tih thu a sawi bawk.