Kan sorkar hun chuan ni 100 chhungin eirukna a tawmim vek ang - ZPM Leader

ZPM leader Lalduhoma chuan nimin khan Thorang bial khaw hrang hrang a tlawh a; sorkarna an chan hunah CBI an ko lut dawn a, ni 100 chhungin eirûkna a tawmim vek tur thu a sawi.

Lalduhoma chuan, Pathian leh mipui zarah ZPM-in sorkarna an chan ngei an beisei tih sawiin, "Kan sorkar hun chuan CBI kan ko lut ang a, ni 100 chhungin eirûkna hi a tawmim vek ang. Eirukna hi kan ram leh hnam tichhe nasa bertu a nih avangin ZPM chuan nasa takin kan do dawn a ni," a ti.

Tuna Mizoram sorkár leiba chu rûl char char pawh ni se, kum 50 vel hun a duh theih thu sawiin Duhoma chuan, "Mahse, ṭha taka kan kal a, sum a nih dan tura kan hman chuan central hian min hrêk reng duhin ka ring lo," a ti a, dik leh rinawm taka an kal chuan Pathian malsâwmna an dawn ngei tur thu a sawi.

ZPM Leader chuan, sawhthing, aieng, hmunphiah, hmarcha, adt. chu sorkár emaw, sorkár mi ruat hmanga lei a nih tur thu sawiin, "Thlái pawh mithiamte ráwn chunga research base-a chìntir a ni ang. Thlai thar hralh a awlsam zawk nan thlai thar inpek tawn dan tur vegetable supply chain pawh ruahmanna felfai tak nena kalpui a ni dawn," a ti.

Mirethei, hma la thei lo te khai chhuahna turin 'Bana kaih policy' (Hand Holding Policy) kalpui a nih tur thu sawiin Lalduhoma chuan, "Mi taima, tih tak zeta hma late chu bank loan hmanga ṭanpui an ni ang a, quarantor-ah sorkar a ṭang ang," a ti a; ZPM sorkar hnuaiah chuan kut hnathawktute leh mi taimate tan dinchhuahna policy kalpui a nih tur thu a sawi a ni.

ZPM Leader hian Thorang bial khaw hrang hrang aṭangin ZPM zawm thar mi 982 a lawm lut niin ZPM thuchhuah chuan a tarlang.