Kawng awlsam ka tiam thei lo - Lalsawta

Congress party president Lalsawta chuan, mipui tana lem nual leh kawng awlsam a tiam thei lo tih sawiin, dinchhuah tum, mahni inchhan chhuah tumte tan ṭang puihna an pek dawn thu a sawi.

Lalsawta hian nimin khan Vairengte Multi­purpose Hall-a Serlui Block Congress Conference a hmanpuinaah thu sawiin, "Mipui tana lem nuam leh kawng awlsam ka tiam ve thei lo che u. Kawng awlsam hi Isua min zirtir dan a ni lo. Rim taka thawka mahni thawh chhuah eia inin, hnam taima ni turin ka duh che u. Kut hnathawktute, mi taima leh thawk rimte dinchhuahna ram din ka tum a ni," a ti.

Retheihna sal aṭanga chhuak turin thawh chhuah a ngai tih sawiin Lalsawta chuan, "Dinchhuah tum, mahni inchhan chhuah tumte tan ṭang puihna kan pe dawn che u. Retheihnain a sal beh, an retheihna remchanga hmanga vau beh leh rilru him pawh pu thei loa sawi ṭhaih tâwkte tan Congress party-in zalenna dár kan vua a ni," a ti a; taimâkna, dikna leh huaisenna nen mahni leh tu leh fate tan Mizoram inthlan hmachhawn turin mipui a chah.

MPCC President chuan, Serlui bialah Congress thlipui a tleh nia sawiin, "Kum 2024-a Lok Sabha inthlanpuiah Congress kaihhruai sorkar a piang thuai dawn," a ti a; Lok Sabha-ah Congress kaih­hruai sorkar a piang ngei dawn niin a sawi a ni.

Inkhawmah hian Lalsawta'n Congress party zawm thar mi 467 a lawm lut niin MPCC thuchhuah chuan a tarlang.