Deputy CM-in YMA inkhawmpui a hmanpui

YMA Sub-Headquarters, Khawzawl chuan nimin khan Sialhawk community hall-ah inkhawmpui vawi khatna an hmang a, bialtu MLA deputy chief minister Tawnluia'n a hmanpui. Inkhawmpui hi April 26, 2023 khan ṭan a ni a, nizan khan a ṭiak.

Tawnluia chuan, Mizoram mipui leh khawtlangin YMA an ṭangkaipui dan sawi sên a nih loh thu sawiin, "YMA ṭangkaizia hi sorkar pawhin a hria a, a ngai pawimawh hle. Ram leh hnam tana ṭha tur leh hmasawnna tura YMA thawhpui kan tumnaah an tlanchhe ngai lo hi an fakawm a, an thlamuanpuiawm tak zet," a ti.

Deputy Chief Minister chuan, YMA member-te chu an awmna hmun apiangah Mizo hnam nunphung, nihphung leh ziarángte chawi nung zel turin a chah.

Tawnluia hian Ph.D ti mek Lalsiammawii, Sialhawk hnenah laptop a hlan a, Khawzawl Sub-Headquarters YMA hnenah inkhawmpui senso phuhrûk nan Rs 3,00,000 a pe. Sub-Headquarters YMA pisa zauh turah theihtawp chhuaha ṭan lâkpui a tum thu a sawi bawk.

Inkhawmpuiah hian an huam chhunga YMA member thi mi 122 sùnna hun an hmang a, chawhnuah Central YMA hruaitute kaihhruaiin kum 2023-2025 chhunga office bearer turte thlan a ni.

Khawzawl Sub-Headquarters YMA-ah hian YMA branch 41 leh group pali - Nikuala Group, Tuichang Group, Kawlkulh Group leh Tuichangral North Group a awm a; member 19,299 awm mekin, mipa 12,067 leh hmeichhia 7,232 an ni.