AAP-in candidate tur mi 20 an nei tawh

Aam Admi Party (AAP) hruaitute chuan nimin khan Aizawl Press Club-ah thuthar thehdarhtute an kâwm a; kumina Legislative Assembly inthlanpui awm tur atan candidate 20 an neih tawh thu leh seat a tam thei ang ber chuh an tum thu an sawi.

AAP-a hmarchhak bial enkawltu Rajesh Sharma chuan, Mizo mipuiin danglamna an duh tih sawiin, "AAP chuan ram pum hmuh turin sorkarna ṭha leh rintlak a lantir a, zirna leh hriselna lamah nasa taka hmasawnna thlenin, Arvind Kejriwal chuan mipui hmuh turin danglamna a thleng thei a ni tih a lantir. Delhi-in danglamna a hmuh theih chuan Mizoram pawhin danglamna kan hmu thei dawn lo'm ni?" a ti.

Mizoram inthlanpui awm turah Assembly constituency tinah candidate ṭha leh rinawm an mamawh tih sawiin Rajesh Sharma chuan, "Danglamna ṭha meichher chhitu ni a, MLA candidate tur hming rawn thawh turin kan inngen a ni. Tuna party danga awm mek, mahni party-a chêp riau nia inhriate pawh AAP zawm turin kan sáwm a, eiru leh tàn-ina tànna khawp hial sual ti tawhte tih loh chu kan party-ah kan lo lawm vek," a ti a; AAP candidate ni tura tling tâwkte chu theihtawpa an puih dawn thu a sawi.

AAP, Mizoram hruaitute chuan, MLA inthlanpui awm tur atan candidate 20 an neih tawh thu an sawi a; party block pali an din tawh thu leh din belh zel an tum thu te, sorkarna an siam chuan sorkar hnathawkte old pension scheme hmantir an tum thu te, zirna leh hriselna lam an ngaih pawimawh dawn thu te, eirûknaa fihlim sorkar siam an tum thute an sawi bawk.