Financial year 2022-2023 chhungin Mizoramah thisen unit 37,419 pek a ni

Sorkar kum liam ta, April 2022 - March 2023 chhung khan Mizoramah thisen unit 37,419 pek a ni a, chu'ng zinga unit 34,252 chu pek bik nei loa a thlàwna pek (voluntary donation) a ni. Kum 2022-23 chhunga thisen pek hi kum hmasaa pek zat aiin unit 9,228-in a tam zawk a, a punna hi 32.73% a tling.

Mizoram State AIDS Control Society (MSACS) chhinchhiah danin, kum 2022-23 chhunga thisen a thlâwna pek unit 34,252 chu pek zawng zawng unit 37,419 aṭangin 91.54% a ni a, Association for Voluntary Blood Donation (AVBD)-in target an siam 90% khûm a ni. Hetih lai hian, pek bik neia thisen pek (replacement) unit 3,167 (8.46%) a awm.

Mizoramah blood donation camp ṭum 589 huaihawt a ni a, kum 2021-22 chhunga donation camp aiin 109-in a tam zawk. Donation camp vawi 589-ah hian thisen unit 23,508 pek a ni a, pek zawng zawng aṭangin 62.82% a tling. Civil Hospital, Aizawl Blood Bank-in donation camp ṭum 203 (kum hmasaah 162) neiin, an nei tam ber a, camp zawng zawng 589 aṭangin 34.47% a ni.

Mizorama blood bank 11 zinga thisen dawng tam ber Civil Hospital, Aizawl tan thisen unit 19,226 pek a ni a, kum hmasa (14,824) aiin a tam; dawng tlem ber Mamit District Hospital-ah unit 501 (kum hmasaah 407) pek a ni. Serchhip blood bank tih loh blood bank dang zawngin kum hmasa aiin 2022-23 chhungin thisen an dawng tam zawk.

Voluntary donation sànna ber Christian Hospital, Lungleiah thisen pek zawng zawng 1,134 zinga 1,132 (99.82%) chu a thlàwna pek a ni a; kum hmasaa voluntary donation sanna ber ZMC blood bank-ah 97.77% niin, Lunglei Civil Hospital-ah 97.73% a ni bawk.

Voluntary donation hniam berna chu Lawngtlai blood bank niin, 83.35% a ni a, a dawttu Synod Hospital-ah 84.79% a ni.

AVBD chuan, an páwlin kum 2022-23 chhunga voluntary blood donation target an siam 90% khûm a ni chu lawmawm an tih thu leh thisen petute inpekna ropui an tih thu an tarlang a; thisen mamawhtu an pun zel avangin thisen pek uar zel turin Mizo mipui an sáwm a ni.