State hlim bera puan kan nih chhan chu sorkar ṭha, mipui sorkar kan neih vang - MNF Media & Publication

MNF-te chuan an Media & Publication dept. bultumin April 29, Inrinni khan Aizawl Press Club-ah thuthar thehdarhtute an kawm a, Mizoram chu India rama state hlim ber (happiest state)-ah thlan a nih thu sawiin, "Sorkar ṭha, mipui sorkar kan neih vang a ni," an ti.

MNF Media & Publication-te thu pawng chhuaktu MNF joint secretary David Zohmangaiha, AMC corporator chuan, Gurugram khawpuia Management Develop­ment Institute hotu pakhat prof. Rajesh K.Pillania kaihhruaina hnuaia zirchiannaah Mizoram chu India ram state zinga hlim berah thlan a nih thu leh April 20, 2023 khan an puan chhuah thu a sawi.

David Zohmangaiha chuan party ṭhenkhatin Mizoram chu chhe vek anga mipui bum tuma kawng hrang hranga an beih thu sawiin, "State hlim bera min thlang hian dawt a nih zia a tilang chiang hle. He sorkar, Pu Zoramthanga kaih­hruaina hnuaiah hian Mizoram hi a chhe vek lo mai ni loin, India rama state awhawm ber pawl leh, hlim ber kan nihzia chu phai lam mithiam, a zirchiangte ngeiin an rawn puang hi a lawmawm tak zet a ni," a ti.

David Zohmangaiha sawi danin, zirchiannaah hian chhung­kaw inlaichinna, zirlai leh zirtirtu inlaichinna, hnathawh kaihhnawih thil, vantlang nun leh mihring chawikanna, sakhua, Covid hripuiin rilru leh taksa hriselna a nghawng dante aṭangin tehfung siam a ni. Heng tehfung hrang hrang hmang hian India ram dinhmun zirchian a ni a, Mizoram chu state hlim bera puan a ni ta a ni.

Zirchiannaah hian Mizorama vantlang inrelbawlna mumal (social structure) tak hian ṭhalaite hlimna a thlen a, Mizo khawtlang nunah hmeichhia leh mipa thliar a ni lo a, naupang an nih lai aṭangin an tel vek thei a ni. Ṭhalaiin hna tê lua an sawi lo a, kum 16/17-ah hna an thawk ṭan thei. Hmeichhe naupang leh mipa naupang enhranna awm loin hnathawh chu chawisàn a ni, tih an tarlang.

Mizoram chu chhungkaw kehchhia tamna a nih tho laiin, ṭhalai zingah nuin an tet lai aṭanga hna a thawhsan emaw, sum zawnga a vahchhuahsante pawh hlamchhiah an ni chuang lo. Nun khawchhuah dan zirtir an ni. Tin, anmahni pawhin sum thawkchhuak turin an bei nasa a, chu chuan midang rinchhan loa eizawng theiin an awm thuai tih hmuh chhuah a ni.

India rama state hlim ber a nih theih chhan chu sorkar ṭha, mipui sorkar, mirethei leh chhumchhiate hnen thleng phak sorkar Mizoramin a neih vang a nih thu sawiin MNF Media chuan, "Mizoram sorkar Pu Zoramthanga kaihhruai sorkar hi chhe lailet derah mi ṭhenkhatin chhuah mek mah se, he sorkar hi an puh ang a nih lohzia a lantir chiang hle. India ram thang chhuak khawpa rorelna ṭha kalpui a, state hlim bera min siamtu he sorkar Pu Zoramthanga kaihhruai hi MNF chuan kan chhuang tak zet a ni," an ti.