Ram tana ngaihtuahna seng turin fuih
April 29, Inrinni khan Mizoram Police leh National Institute of Technology (NIT), Mizoram ṭangkawpin an buaihsaih April 27, 2023 aṭanga neih ṭan 'Hackathon (Hackventure)' chu Arya Mess, PHQ-ah khar a ni a, he hun hmanpuitu Home minister Lalchamliana chuan ram tana ngaihtuahna seng turin ṭhalai leh zirlaite a fuih.
Home Minister chuan, Mizoram Police leh NIT, Mizoramte chu Hackathon hmasa ber an buatsaih theih avanga a lawmpui thu sawiin, "In thawhhona leh thawhrimna a lawmawm. Police-te tan pawh hlawkna tam tak a thlen thei ngei dawn. Ṭhalai leh zirlaite pawhin ram leh khawtlang hmasawnna leh ṭhatna tura ngaihtuahna leh thâ seng zel se ka duh," a ti.
DGP Devesh Chandra Srivastva chuan zirlaiten police-te tana thil ṭangkai tur kawng hrang hrang an rawt chhuahte chu pawimawh a tih thu sawiin, "Police-te tan pawh tih dan phung pangngai baka hmasawn a pawimawh," a ti.
Police-te tana chona lian leh hautak - cyber crime, ruihhlo, traffic management, wildlife protection, hmeichhia leh naupang laka hleilenna, smuggling etc. thilah Mizo ṭhalaite leh mipui vantlang ṭhahnemngaihna zar zo tur hlawk tak a awm chhoh zel a beisei thu DGP chuan a sawi.
Hackathon-ah hian India ram hmun hrang hranga National Institute of Technology zirlaite, Mizoram University, Zirtiri Residential Science College, NIELIT leh ICFAI University-a computer zirlaite an tel
Zirlaite hian police-te'n dan leh thupek an kenkawhnaa harsatna an hmachhawnte an zir chiang a, chumi behchhan chuan smart policing atana technology ṭha an ngaihtuah a ni.