KHAWTHLIR

Covid-19 veite enkawlna siam

Mizoramah Covid-19 vei hmuh belh zel a nih avangin, Civil Hospital, Aizawl-ah Covid-19 veite enkawlna tur bik isolation ward siam thar leh a ni. Civil Hospital, Aizawla staff damlo awmna chu Covid-19 isolation ward-ah leh a ni a, ICU-a awm ngai chu Zoram Medical College-ah refer an ni ang.

Thisen pe

April 29, Inrinni khan ṬKP, Bawngkawn Bial-in BCM Chaltlang Kohhran hmunah Civil Hospital, Aizawl tan thisen unit 92 an pe a, petute mipa 78 leh hmeichhia 14 an ni. KṬP, Melthum Branch-in Synod Hospital blood bank-ah kalin thisen unit 28 an pe a, petute mipa 24 leh hmeichhia pali an ni a; KṬP, Muallungthu Branch pawhin ZMC blood bank tan unit 20 an pe a, petute mipa 14 leh hmeichhia paruk an ni.

Electrical Safety Day 2023 hman a ni

Champhai leh Khawzawl district-ah April 28, 2023 khan Power & Electricity dept chuan Electrical Safety Day 2023 an hmang a, him zawka kawlphetha hman kawnga hriattur pawimawh leh fimkhurna tur hrang hrang an sawiho. Champhaiah hian khawpui chhunga VC leh Consumer's Union hruaitute an tel a; Khawzawlah hian Khawzawl College leh higher secondary school zirlaite leh zirtirtute, Khaw­zawl PE dept thawktute an tel.

Kawng khar dawn

Vaivakawn Post Office chhak, Upper Kanan pengah vawiin aṭang hian PWD leh Chawnpui LC-te'n kawng siamthat hna an thawk dawn a, zing dar 10 aṭanga tlai dar 3 leh, tlai dar 4 aṭanga tlai dar 6 inkarah helai kawng hi khar a nih dawn thu Aizawl Traffic SP in a tarlang a, kawng khar hian hnathawh zawh hma chu a huam ang. Hnathawh tibuai theia lirthei leh bungrua dah phal a ni lo.

Thi-in chhar

Nimin zing dar 7 vel khan Edenthar Veng leh Chanmari West inrinaah C Lalengkima (38), Zotlang Veng, Aizawla cheng mek chu thia chhar a ni. C Lalengkima hi two wheeler taxi driver niin, Chanmari West YMA-in kuang siamin, an khua Saitual Venglaiah phurh chhoh a ni.