World Bank fund cheng nuai 28,000 hmangin damdawi-in thuamṭhat hna thawh mek zel a ni - Health Minister

Health & Family Welfare (HFW) minister Dr R Lalthangliana chuan April 28, 2023 khan Farkawn Primary Health Centre Building thar a hawng a, April 29, Inrinni khan Vaphai, Samthang leh Khawbung khuate tlawhin, khawtlang hruaitute leh sorkar hotute nen an inkawm. Minister chuan, World Bank fund cheng nuai 28,000 hmangin damdawi-in chei/ thuamṭhat kawngah hmalak mek zel a nih thu a sawi.

Khawtlang hruaitute nen an inkawmnaah minister Dr R Lalthangliana chuan kalkhawmte chu ngaihtuahna ngelnghet tak nei tur leh thuthang nazawngte finfiah hmasa loa awih mai lo turin a chah a, "Hmun danga la awm ngai lo nau nei turte awm lailawkna Birth Waiting Hall, Vaphai Health & Wellness Centre-ah ruahman a ni a, World Bank fund cheng nuai 28,000 hmangin damdawi-in cheiṭhat leh thuamṭhat kawngah hmalak mek zel a ni. Health Sub-Centre te chu Health & Wellness Centre-ah hlankai niin, heng zinga 34 velah Ayush Doctor dah a ni a, a dangahte pawh BSc. Nursing dah an ni," a ti a, Sub-Centre awm lohna khua 235-ah Health Clinic dah a nih thu leh hmanraw mamawhte dah vek tum a nih thu a sawi.

Dr R Lalthangliana chuan, hripui leng chung pawhin sorkarin mipui hmakhua ngaiin a theih ang anga hmasawnna a kalpui thu a sawi a, "A rah chhuahte hmuh chhoh zel a ni hi a lawmawm. East Tuipui constituency chhungah pawh hmasawnna hrang hrangte siam a ni a, health infrastructure-te pawh tihchangtlun zel niin, cheng nuai 348 sengin Sesih PHC building sak thuai tum a ni. Khawbung PHC sakṭhat nan pawh cheng nuai 419 proposal siam a ni a, Khawbung Market sak nana hmalakna awm mek belhchhah nan hmalak zui a ni ang," a ti.

Farkawn PHC hawnna inkhawmah Dr R Lalthangliana chuan, "Farkawn PHC-a hmanrua leh mamawh dangte pawh ngaihtuah zel tum a ni a, din a nih aṭanga a vawi khat nan Sesih PHC-ah doctor niin, hun rei loteah Sesih PHC Building pawh sak tum a ni," a ti.

Japan International Cooperation Agency (JICA) nen ṭangduna cheng nuai 70,000 senga Zemabawka Cancer Superspeciality Hospital din tum chu kum 2028-ah zawhfel hman beisei a nih thu sawiin Minister chuan, "Champhai district mipuite chhawr theih turin tunhnaiah Champhai Urban PHC, rikrum thila damlo enkawlna Trauma Centre, RT-PCR Laboratory leh naupang ICU-te hawn a ni a, natna khirhkhân bikte uluk taka enkawlna damdawi-in, khum 50 awmna tur Critical Care Block chu cheng nuai 2,000 senga sak tum a ni," a ti bawk.

Farkawn PHC Building thar hi NABARD (RIDF-XXV) sum cheng nuai 246.94 senga sak a ni a, contractor chu Excell Consultancy Services, Aizawl a ni. September 8, 2020-ah sak hna thawh ṭan niin, April 25, 2023 khan sak zawh a ni a; casualty, X-Ray room, pharmacy, laboratory, minor OT, toilet block, induction room, male & female ward, consultation room, office, store room, labour room, nursing station, isolation room, dirty utility room, choka leh Health supervisor room-te a awm.

Minister Dr R Lalthangliana hi East Tuipui bialtu MLA Ramthanmawia, HFW principal director Dr PC Lalramliana leh sorkar hotu dangte'n an ṭawiawm a ni.