Furpui laia kawngthar lai lo turin Lunglei DC-in NHIDCL-te a hriattir

Lunglei District Disaster Management Authority chuan April 28, 2023 khan an chairman Ramdinliani, bawrhsap kaihhruaiin DC conference hall-ah furpui lo thleng tura khuarel chhiatna a thlena inven dan tur leh hmalak dan tur an sawiho a; NHIDCL-te chu national highway kawng an laihte ṭha taka enkawl a, furpui zawh hma chu kawngthar lai lo tura tih an ni.

Ramdinliani chuan, furpui lo thleng turah khuarel chhiatna hrang hrang thleng thei laka lo inralrin leh chhiatna lo thlen thulha hmalak dan tur ruahmanna fel tak neih a ṭul thu a sawi a, "Chhiatrupna lo thlen thulha chhawmdawlna a thlen zung zung theih nan a kaihhnawih department tinte lo inbuatsaih lâwk a ngai," a ti a, kalkhawmte chu chhiatna hrang hrang thleng thei laka Lunglei district himna tur ngaihtuaha rilru seng turin a chah.

Ṭhutkhawmah hian furpui chhunga chhiatrupna lo thlen thulha inven lawkna chungchangah sorkar department-te mawhphurhna sawiho a ni a, NHIDCL-te chu national highway kawng an laihte ṭha taka enkawl a, furpui zawh hma chu kawngthar lai lo tura hriattir an ni. Fur laia kawngchhiat vanga ration buhfaiah harsatna a awm loh nan kudam hrang hrangah monsoon stoch buhfai dah mek a nih thu tarlan a ni bawk.

Medical department in damdawi-in hrang hrangah damdawi leh hmanraw hrang hrangte lo dahkhawl se, ambulance-te hmantheiha inbuatsaih vek ni se, PWD in Lunglei Circle huam chhunga kawngte mipuite'n harsatna an tawh loh nan kawng hrang hranga hmalak a ngaihnaah ruahmanna lo siam se, Phairuangkai leh Tuichawng lei (bridge)-te rit phur tam zawk zawh theih tura ruahmanna siam ni se, an ti.

PHE department aiawhte chuan Lunglei district-a tui sem chungchangah harsatna an neih loh tur thu leh Pialthleng tui pump-na kawng siamṭhat kawngah hmalak a ngaih thu an sawi. Power & Electricity department hotute chuan englai pawha power supply a khaihlak loh nan an vil reng thu an tarlang.

Tlabung Rural Development Block chhunga tuilianin khaw ṭhenkhat a chim chungchangah sorkar department hrang hrangte chhanchhuah hna leh chên lailawkna siam kawngah ṭha taka thawkho tura ruahmanna siamte an rêl a; khuarel chhiatna a thlen palha mipuite himna tur leh biak pawh theih turin District Emergency Operation Centrer, DC Office chu engtiklai pawha a inhawn reng thu tarlan a ni bawk.