Hmasawnna hnathawhnaah thurâwn pe ṭhin turin zirlaite sawm

Tuikum Bial Zirlai Pawl chuan April 29, Inrinni khan MZP conference hall-ah General Assembly cum Election 2023 an nei a, bialtu MLA Lalrinawma, minister-in hmanpuiin, hmasawnna hnathawhnaah thuràwn leh rawtnate a hnena thlen zel turin zirlaite a sawm.

Lalrinawma chuan, zirlaite chu mahni inthunun thiam leh thil tumah chiang chunga theihtawp chhuah turin a chah a, "In vela hna­thawh tur awm apiangte a hniam emaw, a sang emaw, thawk thiam ang che u. Hemi kawngah hian theihtawp chhuah a pawimawh," a ti.

Zirlaite chu nakin lawka khawtlang leh ram hruaitu ni mai tur an nih thu sawiin Tuikum Bialtu MLA chuan, "Mipuite innghahna tur in ni a, nun uluka, ruihhlo lakah fihlim leh Pathian ráwn chung zela theihtawp chhuah a pawimawh. Hmasawnna hna thawhna kawngah thuràwn leh rawtnate ka hnenah tlen zel ang che u," a ti a, bial a enkawlna kawngah zirlaite leh bial mipuite nen thawhhona ṭha tak an neih ṭhin thu a sawi.

Tuikum Bial Zirlai Pawl Assembly hi assistant secretary B Lalrohlua'n a kaihruai a; general secretary B Lallawmkima'n report pein, president Krosthanga'n pawhin thu a sawi. Chawhnu lamah hruaitu thar thlan a ni.