Khaw êng zahna a tlem tawh hle - CYMA Vice President

Maubawk Branch YMA chuan April 28, 2023 zan khan YMA kumpuan 'Ram leh Hnam Humhalh' hawn inkhawm an buatsaih a, a hawngtu Central YMA vice president Lalhmachhuana chuan Mizo khawtlangah khaw êng zahna a tlem tawh hle niin a sawi.

CYMA Vice President chuan Mizo khawtlangah khaw êng zahna a tlem ta tih a sawirualin, biak-in chhung erawh zah ala nih thu a sawi a, "Khawlai hmun hrang hrang erawh kan zah ta lo, kawng sir leh mi tamna hmuna lo inchiu duh tawk kan tam ta hle mai, inenfiaha siam ṭhat ngai kan la nei ngah hle a ni," a ti.

Thil dik lo nia hriatte an la tlangau pui hram hram avangte hian Mizo hnam hi a la tlu lo mai mai nia sawiin Lalhmachhuana chuan, "Thlan tla-a hlawh hmu ai chuan smart taka mibum ching kan ngaisang a, hengte hi kan sim a hun tawh hle. Mizote hi hnam thuawih leh hruai nuam kan ni," a ti a, system ṭha tak a awm chuan an zui hreh loh thu a sawi.