Hmun hnihah kuhva rah man a ni

Mizoram Police-te chuan April 29, Inrinni zing leh zan khan Champhai leh Khawzawlah kuhva rah eng emaw zat an man.

April 29 zan khan Champhai Police patrolling party-te chuan Myanmar aṭanga dan loa lakluh nia hriat kuhva rah ip 120 chu Zion Veng, Champhai YMA Park bul mual zualah an man. Kuhva rahte hi Lalthlamuana, Bethel Veng; Lalramchhanhimi, Electric Veng; Baby Laltlansai, Kahrawt Veng leh Lalzuithangi, Zion Veng, Champhaite ta niin, dan anga hmalak zui turin Custom Preventive Force Superintendent, Champhai hnenah hlan a ni.

Khawzawl Police-te pawhin April 29 zing khan 2nd IR Bn. main gate-ah lirthei pathum aṭangin kuhva rah ip 190 an man. Lirthei khalhtute chu Lalhruaithara, Champhai Zote; Lalzarliana, Tlangsam leh Lalhmingtluanga , Tlangsam nia inchhalte an ni.

2nd IR Bn. main gate-a duty constable Rohmingliana chuan kuhva rah phurte hi lo tidingin, Khawzawl Police Station a hriattir nghal a, police-te chuan kuhva rah leh a phurtute hi an man ta a ni.

Kuhva rah leh lirtheite hi Custom Preventive Force Superintendent, Champhai hnenah dan anga hmalak zui tura hlan a ni.