Treasurer aṭanga Zodintluanga banna theh luh pawm thuai nise kan ti - MPCC President

Mizoram Pradesh Congress Committee (MPCC) president Lalsawta chuan nimin khan Congress Bhavan-ah thuthar thehdarhtute a kawm a, MPCC treasurer aṭanga Zodintluanga'n banna a thehluh chu pawm thuai nise an tih thu a sawi.

Lalsawta chuan April 30, 2023-a an party-a senior member-te thurâwn angin Zodintluanga nen April 30, 2023 zan khan an inhmuh thu sawiin, "Rilru inpawh tak leh uluk taka kan sawi dun hnuah kan party ṭhat leh chak zawkna atan a treasurer nihna hi ama rawt leh duh angin, ui tak chungin pawm thuai nise kan ti," a ti.

An party-a senior member-ten palai ang deuha hma an lak thu sawiin MPCC President chuan, "Banna a thehluh lai hian Delhi-ah ka zinbo a, ka rawn hawin ani West Phaileng lamah a zina, kan inhmu lawk thei lo a ni," a ti a, hun remchang an neih dun hmasak berah Zodintluanga nen hian an inhmuh thu a sawi.

Lalsawta chuan Zodintluanga duh anga thuthar thehdarhtute kawm an nih thu sawiin, "A banna thehluh hi executive-in kan pawm anga, a ṭul angin a thlaktu tur kan la ngaihtuah dawn," a ti.

MPCC President sawi danin, party-a thawhhonaah ngaihdante a in an loh châng awmin, lungrual ṭhap theih loh châng awm ṭhin mah se, dawhthei taka inhriatthiam tlân zel a ngai. Zodintluanga hian treasurer ni tawh lo mah se, an party ṭhatna tur chuan theihtawp chhuah a inhuam.

Zodintluanga chu an party nomi­­­­­nation committee-ah treasurer a nihna anga awm a nih avangin a awmzui thei tawh dawn lo tih zawhna chhangin Lalsawta chuan a sawi.

Zodintluanga erawh chuan Congress Legislature Party leader a nihna angin an party dan-in awmzui zel a phalsak thu a sawi thung.

Zodintluanga'n banna a theh­luha a thuziah chungchangah Lalsawta chuan, "Thuziak tam tak a awm a, a dik pawh a awm anga, a dik lote pawh a awm ang. A ṭul phawt chuan kan insiam ṭha thei a, in­siam­ṭhat pawh a ṭul kher lo mai thei," a ti.

Zawhna chhangin Zodintluanga chuan, an party ṭhatna tura a hriat vangin ngaihtuahna fim tak hmanga treasurer aṭanga banna thehlut a nih thu sawiin, "Kei aia ṭha zawk leh fel zawk an ruatin ka ring," a ti a, Congress party chhuahsan tumna a neih loh thu a sawi.