Thla 6 chhung hlawh an lâk loh avangin DIET-a thawktute'n hna an chawlhsan

District Institute of Education and Training (DIET)-a thawkte, Association of Mizoram DIET Employees (MADE) chuan an service chungchangah harsatna hrang hrang an tawh avang leh thla ruk chhung hlawh an lâk tawh loh avangin nimin aṭang khan hna an chawl a; ei tur thawh chhuah a ngaih avangin an hna pangngai an thawk thei rih lo tih an tarlang.

MADE chuan nimin khan thuchhuah siamin, an service chungchangah harsatna hrang hrang an tawh ṭhin thu leh thla ruk chhung hlawh an lâk tawh loh thu an tarlang a, "Mizoram sorkarin kan hlawh tur atana a tum ve tur state matching share min pek theih loh avangin thawktuten kan ei tur ngaihtuah a ngai a, kan hna kan thawk thei ta rih lo," an ti a, an harsatnate chu Mizoram mipuiten hriatpui se an duh thu an tarlang.