Kan ram tana ding kan ni - Lalduhoma

ZPM chuan nimin khan an party office-ah mithar lawmluh inkhawm an buatsaih a, mithar lawmluttu ZPM leader Lalduhoma chuan, mimal tan ni lo, Mizoram tana ding an nih thu a sawi.

Lalduhoma chuan, policy-ah an din reng dawn tih sawiin, "Mimal tan kan ding loa, kan ram tan policy-ah kan ding reng dawn. ZPM hi Pathianin min kaihruai a, sorkar lai pawhin a ngam loh kan ni mek tawh. Nghet takin kan ding a, hmalam kan pan zel ang. Kan chunga lo thleng hi kan ṭawngṭai chhànna, Pathian hnathawh niin kan hria. Kan ṭhatna turin Pathianin ro min relsak zel dawn a ni," a ti.

ZPM Leader chuan bial viltu ruat dan chungchang sawifiahin, "Bial viltu tur thlithlaiin hun eng emaw chen aṭang tawh khan Search Committee din a ni a, an theih ang anga hma an lak hnuah OB-te chuan Search Committee-te hian bial viltu tur ruat theihna nei rawh se, tiin an rawt," a ti a, râwn theih leh râwn ngai nia hriat zawng zawngte an rawn kim thu a sawi.

Rawtna awm angin Search Committee-te chu Nomination Committee-ah rin zui nise tiin lungrual takin an pawm tih sawiin Lalduhoma chuan, "Meeting hrang hrang kan neihah a tam zawk duh danin thutlukna kan siam mai loa, kan zavaia duh tlân, 100% hlirin thutlukna kan siam a ni," a ti.

ZPM Leader chuan an mite'n sorkarna siam loh an hlau tawh tih sawiin, "Candidate ruat chungchangah pawh ngaihdan hrang hrang a awm phah lo thei lo. ZPM-ah hian mi thiam leh mi ṭha tak tak an lo luh ruih ruih reng avangin bial insem chungchangah pawh harsatna pawh kan tawk lo thei lo a ni," a ti.

ZPM-a lawmluh thar Lalnghinglova Hmar (Tetea Hmar) pawhin thu sawiin, beidawngte karah beiseina nei tlat mihring tam tak an la awm tih sawiin, "Anni pawh sorkar se engmah tak tak an ni chuang lo ang ti fotute hi mi beidawng an ni zawk. Keini chuan beiseina kan nei a, ram hi siamṭhat theih a la ni," a ti a, beiseina mei an chhi alh zel dawn niin a sawi.

Lalnghinglova chuan, tu party mah sawi chhiat a duh loh thu leh a tum loh thu sawiin, 'Chutihrualin, tun kan ram dinhmunah hian kan lung a awi em, tun anga kan awm hi a tawk kan ti a nih chuan kan vote-na ngaiah i vote ang chu. A nih loh chuan kumin inthlanah ZPM vote mai rawh,' a ti.

Lok Sabha inthlanah inde­penendent-a a lo din tawh thu sawiin Lalnghinglova chuan, "Party pahnihin min thlawp a, vote pawh ka hmu ve nual. A tawpah vote belhkhawm a ni a, 8,000 velin kan vote a tlem zawk. Mah se, ka inchhir lo," tiin MP inthlana a in candidate avangin thil tam tak a zir chhuah thu a sawi.

Tetea Hmar chuan a zir chhuah langsar tak chu politician-te thawhrimna leh zahawmna a nih thu sawiin, "Eng party pawh ni rawh se, tun hma aṭanga lo bei tawhtu politician-te hi an thawkrimin an zahawm. Politics-a zuanluh chhan a in ang vek lo a nih pawhin, a tam zawk hi ram siam duh an ni a, ram pawh an hmangaih," a ti.