September-ah health care bill tangte a zualpui tal pek tlak theih kan tum - Health Minister

Health & Family Welfare minister Dr R Lalthang­liana chuan nimin khan Civil Hospital, Aizawl (CHA)-ah Mizoram Journalist Association member-te tana buatsaih Free Health Check-Up a hawng. Minister chuan, September-ah healthcare bill táng mekte pek tlak vek a nih loh pawhin, a zualpui tal pek theih tum a nih thu a sawi.

Hawnna inkhawm CHA Doctors’ Seminar Hall-a neihah khuallian Dr R Lalthangliana chuan, health care scheme sum indaih lohna chu a ngaih pawimawh thu sawiin, "Sum indaih lohna phuhruk nana ADB aṭanga sorkarin sum a pûk tur cheng vbc. 1,000 chu July/ August thla velah hian hmuh theih beisei a ni. Beisei anga thil a kal chuan September thlaah chuan health care bill tang mekte chu pek tlak vek hman a nih loh pawhin, a zual­pui tal chu inpek theih tum a ni," a ti.

Health Minister chuan, Civil Hospital, Aizawl chu khawpui hmun laili taka awm, damdawi-in pawimawh tak a nih thu a sawi a, "Damdawi-in hi a hlui tawh avangin cheiṭhat tuma hmalak mek a ni. Mizoram sorkarin chanchinbumite hamṭhatna a ngaihtuah zel dawn," a ti a, MJA member-te chu free health check-up ngai­pawimawh turin a ngen.

Civil Hospital, Aizawl main gate bula Trauma Center sak mek chung­changah Health Minister chuan, a rang lama sak zawh tum a nih thu leh a ṭul anga department hrang hrangte khungleng thei tura ruahman a nih tur thu a sawi.

Dr R Lalthangliana chuan Cardiology leh On­cology department-ah super specialist doctor lâk thar an nih thu sawiin, "Mamawh phu­hruk lailawk nan CSR kal­tlangin doctor, nurse leh laboratory technician-te chu NEIGRIHMS-ah training tir an ni," a ti.

Inkhawmah hian Health & Family Welfare Board vice chairman Dr ZR Thiamsanga, MLA leh MJA president C Lalram­buatsaihate pawhin thu an sawi.