Green Mizoram Day-ah thing ṭiak a lian sa phun a ni tawh dawn

Environment, Forest & Climate Change (EFCC) minister TJ Lalnuntluanga kaihhruaiin nimin khan CWC conference hall-ah State Level Sub-Committee on Green Mizoram an ṭhukhawm a, Green Mizoram Day hman dan tur chungchang an sawiho. Kum kaltawhah thing ṭiak phunte a tet deuh ṭhin avangin duh angin a nung zo lo fo a, chuvangin a liansa deuh phun tawh ni se, an ti.

TJ Lalnuntluanga chuan, ramngaw hum­halh leh venhim a pawimawh thu a sawi a, "Green Mizoram Day hman ṭhin hian mipuiah rah ṭha a chhuah zel ka beisei. Mizoram thing leh mau, nungcha humhalha tih­changtlun kawngah mi ṭhahnemngai tak tak an pungchho zel a, a lawmawm hle," a ti a; thing leh maute chu mihring mamawh chi hrang hrang petu a nih avangin duat taka enkawl kawngah Forest deparment kutah dah mai loin, mi tinin an mawhphurhnaa an lâk a ṭul thu a sawi.

Sik leh sa danglam avangin khawvel pumin harsatna a tâwk mêk tih sawiin Minister chuan, "Mizoram ngei pawhin harsatna tam tak a tawk a, hei hi ramngaw tih chereu nasat vang niin, harsatna lian zawk tawk lo tura ramngaw humhalh a ngai takzet tawh. Mipuite hnena zirtirna ṭha zawk thlen a nih theih nan kumina Green Mizoram Day hman tur pawh awmze nei taka duan a ngai," a ti.

Ṭhutkhawmah hian hmalakna tur hrang hrang duan a ni a; Green Mizoram Day 2023 thupui atan ‘Thingphun ila, enkawl zui ang u' (Plant a tree and keep it save) tih hman a ni ang. State level-ah chuan Green Mizoram Day hi June 9, 2023-ah Sihphira Sakawrhmuituai tlangah hman ṭan ni se, an ti. Khuallian atan Chief Minister an beisei bawk.

Green Mizoram Day hi kum 1999 aṭangin hman ṭan a ni a, kum tin June ni 11-ah hman ṭhin a ni. Green Mizoram Day 2022 pual khan Mizoram hmun hrang hrangah thing ṭiak 19,261 phun niin, thing ṭiak 1,18,540 sem chhuah a ni.

ṬHUTKHAWMA THUREL ṬHENKHAT

▶ Kum kaltawhah thing ṭiak phunte a tet deuh ṭhin avangin duh angin a nung zo lo fo a, chuvangin a liansa deuh phun tawh ni se.

▶ Thing ṭiak phunte dam khawchhuah ṭhat nan he ni puala thing ṭiak la turte chu an thingphunte an enkawl zui ngei ang tih intiamkamna nena pek ni se.

▶ Thingphuntute phun nun zat report thehlut leh tura beisei an ni tawh dawn.

▶ State level leh district level-a kângmei veng ṭha district leh khua lawmman pek ṭhin chu chhunzawm ni se.

▶ Aizawl district bikah video clip hmanga inelna neih a ni ang.

▶ Green Mizoram Award chu mimal leh pawl hnenah pek ni se.

▶ Award dawng thei tura hming thehluh dan leh mipui hnena puangzar hna chu Forest deparment-te kutah dah a ni.

▶ Green Mizoram Day pual talk show buatsaih leh ni se, chanchinbu leh media dangahte uar zawka puandarh tura hmalak ni se.