Covid-19 in kawng tam takin min ti ṭhuan awp - Tawnluia

Tuichang North Block MNF bultumin nimin khan Zaingen YMA Hall, Khaw­zawlah mi thar lawm luh inkhawm buatsaih a ni a, mithar lawmluttu MNF sr. vice president Tawnluia, dy. chief minister chuan Covid-19 in kawng tam takin min tih ṭhuanawp thu a sawi.

Tawnluia chuan Covid-19 in khawvel a rûn a, Mizoram pawh a tuam tih sawiin, "Chu hun harsa avang chuan sorkar pawhin hmasawnna chi hrang hrang thawk turin harsatna a nei. Mizoram sorkarin sum leh pai kan hmuh tur cheng vbc. 3,000 chuang chu Covid vang hian kan hmu ta lo. Chu chuan kan development, hmasawnna tur kawng tam takah min tiṭhuanawp lo thei lo a ni," a ti.

Covid-19 avanga sum harsatna sorkar hnathawk leh mi puitling zawkte'n an hmu thiam em em nia sawiin Tawnluia chuan, "Chutiang ang harsatna karah pawh chuan kan sorkar hian Zoram mipuite venhimna leh hripui a darh zel lohna turin kohhran te, NGO te, mipuite nen ṭangrualin ṭha takin hma kan la tlâng thei kha a ropui a, Pathian malsawmna ropui tak a ni," a ti a; economics lamah leh hmasawnna lamah erawh a pawh ṭhut thu a sawi.

MNF Sr. Vice President chuan MNF chu Mizo hnam party, Mizo hnam hmahruaitu nia sawiin, "Pathian leh kan ram tan tih lungphum a hmangin Pu Laldenga, kan hnam pa hoin din a ni. Ringtute kan nihna angin politics-ah pawh Pathian kaihhruaina, awmpuina, chenpuina kan mamawh. Ram enkawl tura inbuatsaihna a nih avangin Lalpa'n MNF party hi a hlamchhiah lo," a ti.

Inkhawm hi Tuichang North Block MNF president K Thangliana'n a kaihruai a; MNF Sr. Vice President hian an party-ah mi 370 a lawmlut nia tarlan a ni.