KHAWTHLIR

MZU VC thar

Mizoram University vice chancellor thar Prof. Dibakar Chandra Deka chuan nimin khan vice chancellor mawhphurhna la mektu Prof. Pravakar Rath hnen aṭangin vice chancellor mawhphurhna a la a; MZU-a vice chancellor a nih hun chhung tur chu kum 5 chhung emaw, kum 70 a tlin thleng emaw (a hma zawk zawk) a ni ang.

Vawk khuahkhirh

Champhai district magistrate James Lalrinchhana chuan tunhnaiah Ngur khua, Champhai district-ah vawk damlo leh thi eng emaw zat chu hmunpui lama endik tura an sample lak a nih thu a tarlang a; Ngur khua aṭangin vawk/vawk sa leh vawk sa aṭanga thil siam hralh, thawn chhuah leh lakluh khap a nih thu a puang. Thupek zawm lote chu dan hmanga hrem an ni ang.

Governor tanpuina

Aizawl district bawrhsap Dr Lalhriatzuali Ralte chuan nimin khan Governor's Discretionary Fund aṭangin Aizawl district-a Home pali - Thutak Nunpuitu Team (TNT), Zuangtui; Gan Sabra Society, Zonuam; Abundant Life Home, Leitan leh SA Motherless Babies Home, Tuikual hnenah ṭanpuina Rs 25,000 ṭheuh a hlan. Ṭanpuina sum sem zawng zawng hi a vaiin Rs 1,00,000 a ni.

Tlan khap

West Phaileng, Dinthar veng chhung bazar aṭanga Workshop Veng short-cut na kawng chu a zim avang leh a chhuk chhoh avangin LMV leh a aia lian rit phur tan tlan phal a nih loh thu Mamit SP in a tarlang a, thupek bawhchhia chu U/s 179 MV Act hmanga hrem theih an nih thu a tarlang bawk.

Heroin man

Excise & Narcotics department leh Serchhipa 23rd Sector Assam Rifles chuan April 30, Pathianni khan an thudawn bawhzuiin East Lungdar leh Mualcheng inkarah cheng nuai 154.05 man heroin (No.4) an man.

Dan phal loh man

23rd Sector Assam Rifles leh Customs department, Zokhawthar ṭangkawp chuan nimin khan Zokhawtharah ramdang zu, meizial leh kuhva rah eng emaw zat an man a, an thil man hlut zawng chu Rs 11,81,600 a ni.