ZMC-ah internship ṭan a ni dawn; April 30, 2024-ah an zo fel ang

Zoram Medical College (ZMC) aṭanga MBBS zirchhuak zirlai 68 leh rampawn aṭanga zirchhuak zirlai parukte'n ZMC-a internship an ṭan tur pualin nimin khan ZMC Lecture Hall-ah Internship Orientation Programme hman a ni a, Health & Family Welfare minister Dr R Lalthangliana'n a hmanpui.

Dr R Lalthangliana chuan, ZMC-a zirlaiten internship an ṭan thei tur chu thil chhin­chhiahtlak tak a nih thu a sawi a, "Mizoramin mellung kan phun thàr pawimawh tak a ni. Hripui lên nasat laia Dedicated Covid Hospital-a ZMC puan a nih avanga zirlaite harsatna tawh pawhin kian lam a pan mek hi a lawmawm a, ZMC-a PG Course hawn a nih theih nan leh India rama medical college ṭha ber pawl a nih theih nan ṭan la ṭheuh ang u," a ti.

Kum zabi 21-na chu tumruhna leh chhelna hmanga hmachhawn ngai a nih thu sawiin Health Minister chuan, "Zirlaite'n vawiina in thlen chin hi duhtawk mai lo ang che u," a ti a, Mizoramin doctor tam tak a mamawh avangin super speciality thleng zir tum turin a fuih.

Dr R Lalthangliana chuan ZMC-a khum (general bed) 145 vel awm ṭhin chu khum 432-a nih tawh thu leh khum 500-ah hlankai thuai a beisei thu te, ICU khum 13 awmna chu khum 50 chuang awmnaah hlankai a nih thu te, mi 60 awm theihna tur Intern Hostel chu peihfel thuai a nih tur thu te, cheng nuai 1,000 ve ve senna tur ZMC Boys & Girls Hostel sak mek a nih thute leh cabin 52 hawn mai theih a nih tawh thute pawh a tarlang.

ZMC-a internship nei turte hian May 3, 2023 (nilaini) thleng orientation programme hi an nei ang a, internship hi kum khat chhung neih tur niin, April 30, 2024-ah an zo ang.

He hunah hian ZMC dean Dr Swati M Paki, director Dr John Zohmingthanga leh registrar Dr Jane L Ralte te pawhin thu an sawi.