Kolasiba lirthei chuàn man ennawn

Kolasib bawrhsap John LT Sanga kaihhruaiin nimin khan DRDO conference hall-ah Kolasib district-a lirthei hman man bithliah dan ennawn a ni a; lirthei hman man thar an ruahmante chu State Transport Authority-ah thlen an rêl.

John LT Sanga chuan, litrhei hman man bithliah dan ennawnna chuan mipui nawlpui a nghawng theih avangin thil tam tak ngaihtuah tel chunga ruahmanna siam a ṭul thu a sawi a, "Kum tina thil man san dan leh khawsak phung hautak dante thlir chungin lirthei khalhtute dinhmun saimṭhat chu thil pawimawh tak a ni. Hetihrual hian lirthei khalh chu mipui tana rawngbawlna pawimawh tak a ni tih hriat a pawimawh," a ti.

Ṭhutkhawmah hian Kolasib district-a lirthei hman man bithliah ennawnna hnuhnung ber chu February 1, 2021 khan neih a nih thu leh chumi zulzuia State Transport Authority-in rate a bithliah chu September 1, 2021 aṭang khan hman ṭan a nih thu tarlan a ni a; mi pakhat zelah maxi cab hman man chu km khatah Rs 4.35, taxi hman man km khatah Rs 50, auto rickshaw hman man km khatah Rs 40 leh bus hman man km khatah Rs 4 angin State Transport Authority-ah rawtna siam ni se, an ti.

He hunah hian Kolasib district-a sorkar hotu te, lirthei hmanga eizawng pawl hrang hrang hruaitu te, khawtlang leh tlawmngai pawl aiawhte leh Kolasib District Consumer Union hruaitute an tel.