Harsatna thleng chinfel dan tur sawiho

Khawzawl district huamchhunga national highway no.6 kawng laih hna thawh mek vanga harsatna thleng hrang hrang sutkian dan tur ngaihtuahin nimin khan Khawzawl DC conference hall-ah DC Lalrohlua hoin meeting neih a ni.

Meeting-ah hian Khawzawl district chhunga NH no. 6 kawng laih hna thawh meka harsatna thlengte leh mipui lam aṭanga report lutte ngaihthlak a ni a, harsatna thleng hrang hrang zinga chinfel theih angte chu chinfel nghal niin, a hmunah kala enfiah ngaite pawh hun remchang hmasa berah enfiah turin ruahmanna siam a ni.

K Lalrohlua chuan, kawngpui ṭha chu hmasawnna a nih thu sawiin, mimal emaw pawl ang emawa harsat siam mai loin, lungawi lohna an neihte chu a hnena thlen zung zung ṭhin turin complaint neite a chah.

Ram leh hnam hmasawnna tiṭhuanawptu ni loa, a thawhpuitu ni zawk turin mi tin a ngen a, "Harsatna awmte chu ṭha taka sawihoa, a rang thei ang bera chinfel zung zung zel hi ka duhthusam a ni," a ti.

Meeting-ah hian Addl. DC,SDO Sadar, SDC, NHIDCL aiawhte bakah Shri Balaji Company, Dwarkamai Construction Ltd., Dhariwal Buildtech Ltd. Project Manager ṭheuh te leh Surveyor/DPR Consultant-te an tel.