Aizawl DC-in luia tih tur leh tih loh tur a tichhuak

Aizawl district bawrhsap Dr Lal­hriatzuali Ralte chuan lui kalnaa tih tur leh tih loh tur chung­­­­changah thuchhuah a siam a; chetsualna a thlen palhin Emer­gency Response Support System (ERSS) phone number 112 leh District Emergency Ope­rational Centre phone number 1077-ah engtik lai pawhah biak theih a nih thu a tarlang.

Bawrhsap chuan, tun hnaiah khua a lum chho leh ta hle tih tarlangin, "Mipuite tui hmunah chhungkua leh ṭhianho intihlima hun hmang turin kan kal nasa hle a, heng hmunahte hian tui tla leh chesuala nunna hlu tak chán an awm leh ṭhin hi a pawi hle mai. Heng laka kan fimkhur nan leh chhiatna thleng thei laka kan lo him zawk nan tih tur leh tih loh turte tarlante hi kan hriata kan zawm a pawimawh hle a ni," a ti a, veng/ khua ṭheuhah mipuite him nan a ṭul anga hma la tur leh zirtirna a tam thei ang ber nei turin a ngen nghal.

Tih tur leh tih loh turte

■ Lui kal dawnin tui thiam ngei hruai tel ṭhin ang che.

■ Tui thiam nih loh chuan tui chen loh tur.

■ Lui kalna tur hrechiang hmasain, lui a thûk em tih leh tui chenna atan a him tawk em tih hre chiang hmasa ang che.

■ Luia kal zat hriatchian tur a ni a, kan kim em tih in chhiar ṭhin tur a ni.

■ Tui thiam lo kal kan nih chuan life jacket emaw tuia làn theihna chi ken tel tur.

■ Tui tla an lo awmin kan hleuh thiam lo a nih chuan tuiah zuan luh ve ngawt loh tur. Tui thiamte emaw ṭanpuitu a rang lama zawn hmasak zawk tur a ni.

■ Tui tla an awmin tui kan hleuh thiam lo a nih chuan vaukam aṭangin hmawlh sei emaw, mau sei emaw hmanga an mahni pawh chhuah theihna tur siam tur.

■ Suar dài kai angaihin a khauh lai kherah dai kai loin, a thuk lo lai leh tui khauh lo lai zawn hram hram tur a ni.

■ Rui chungin emaw, harhfim loin tui chên/tuia luh loh tur.

■ Tui zang khauhna hmunah tuman tui chen loh tur a ni.

■ Lui dunga kan kalin khawchin ngaihchan ṭhin tur. Saberekakhuangkaih thleng thei lakah fimkhur tur.

■ Balu lâk hmanga eizawngte’n balu kan lâkin hmun khat ami thûk deuhin lâk loh tur a ni.

■ Lui kan kalna hmunah harsatna kan tawh pawha hriattirna kan pek zung zung theih nan inbiakpawh theihna hmun (phone signal ṭhatna hmun)-ah te kal ni se.

■ Tuia chesual an awmin a bulhnaia veng/khuaa tui thiam awmnate a rang lama hriattir ṭhin tur a ni.