Tuiah mi 2 an tlahlum

April 30, Pathianni khan Tuipui Ferry kai, Chhim­tuipui leh Tlawng luiah mi pakhat ve ve an tlahlum.

C Lalrinmawia (32) s/o Zoramnghinga, Siaha­tla Sap Sikul Veng chu Pathianni tlai dar 3:20 vel khan Tuipui Ferry kâi, Chhimtupuiah a tla hlum. C Lalrinmawia hi a chetsual laia a bulhnaia awmten chhan tumin an bei nghal a, tui aṭangin la chhuak mah se, a nunna chhan theih a ni tawh lo. Vawiinah vui a ni ang. Tui aṭanga C Lalrinmawia la chhuak tute hi naupang pahnih an ni.

Pathianni chhun dar 2:30 vel khan Michael Lalhruaizela (18) s/o Lalrimawia, Vaivakawn, Aizawl chu Tlawng luiah a tlahlum.

Michael Lalhruaizela hi a ṭhiante nen Tlawngah hian an kal a, tui an chên laiin a ṭhianpa pakhat nen an chesual a ni.

Michael Lalhruaizela ṭhianpa hi chhan chhuah hman a ni a, ani erawh an chhan hman lo. Sairang Dinthar YMA-in kuang siam sakin, an hall-ah chawlhpui a nih hnuah an veng panpui a ni.