Cong MLA-te'n thla khat hlawh Covid-19 dona atan CM-ah pe, 'Boruak azirin a ṭul angin kan che zel ang' - CLP Leader

Congress Legislature Party (CLP) chuan May thlaa an hlawh zawng zawng (basic pay) chu nimin khan chief minister Zoramthanga hnenah Covid-19 dona atan an hlân. CLP leader Zodintluanga chuan, boruak azirin a ṭul anga an chêt zel tur thu a sawi.

CLP hian nimin khan Aizawl Press Club-ah thuthar thehdarhtute kâwmin, Covid-19 dona atan May thla hlawh basic pay 100% an pek tur thu an puang. Chumi zawhah CLP member pangate'n May thla hlawh an thawh khawm Rs. 4,00,000 chu Chief Minister hnenah an hlân a nghal. CLP Leader chuan, pawisa chu Chief Minister hnena a hlan pahin, CM Relief Fund atan an pe lo a, Covid-19 dona atana hman tur a nih thu a sawi.

Thuthar thehdarhtute an kawm­naah Zodintluanga chuan, an party chu committee thua kal a nih thu sawiin, "President emaw, leader-in mahni thuin thutlukna a siam tawp ngai lo. CLP pawh chutianga kal chu kan ni. Covid-19 avangin CLP member-te mahni bialah awmin, mipui leh khawtlang harsatna tawhte an buaipui a, chuvangin, rorel zung zung theih a ni lo," a ti.

CLP Leader chuan, CLP member zinga pahnih C Ngunlianchunga leh KT Rokhaw-te chu May 18 khan Aizawlah an rawn lêt a, Nihar Kanti Chakma chu a bialah a la awm thu a sawi a, "Thawhlehni khan kan ṭhukhawm nghal a, May thla hlawh basic pay 100% Covid-19 dona atana thehluh turin thutlukna kan siam a ni," a ti a; hmabak hriat a nih loh avangin Covid-19 dona atan a ṭul anga an chêt zel tur thu a sawi.

Zodintluanga chuan, CLP Leader a nih anga sorkar hnathawk hlawh cut hmain Chief Minister-in 'Sum harsat thu a sawi a nih chuan' MLA-te che hmasa tur an nih thu a sawi hnuah sum thawh chungchangin sawi a hlawh tih a tarlang a, "MLA-te meeting tura an tih khan ramria duty-te tlawh programme kan siam vek tawh a ni," a ti.

Ramri tlawha an zin hma zanin ṭhutkhawm tur tih hrilh an nih thu sawiin Zodintluanga chuan, "Programme kan neih tawh thu kan hrilh. Kan zinnaah MNF, ZPM leh BJP MLA-te'n an hlawh 30% leh an fund cheng nuai 50 ṭheuh thawh an remtih thu kan lo hria a ni," a ti a; CLP-te chu hlawh thawh duh lo leh meeting-a tel duh loa puh lêt an nih thu a sawi.

Congress Legislature Party leader Zodintluanga chuan, legislature party hrang hrang aiawhte meeting-a an tel loh chhan an hre vek chungin Speaker hoa meeting-in, 'CLP-te chuan duh angin rêl rawh se' an tih thu sawiin, "Hetiang thil hi a awm zen zen lo. Kan tel loh chhan an hria a, innghah ve âwm tak a ni. Hmanhmawh taka an rèl kha tunah chuan a thu bak a la awm lo. Thawh tawh ni se chuan hriat tur a awm ka ring," a ti.

MLA fund chungchangah an party chuan ngaihdan an nei a, chu chu tun hnaia Chief Minister hoa meeting-ah party aiawhin Joseph Lalhimpuia'n a sawi chhuah thu sawiin Zodintluanga chuan, "Kan party chuan tun ang hun­ah chuan kum 2020-21 MLA fund hi Covid-19 dona atan hnuhkîr kan remti a, CM hoa meeting-a sawi chhuah a nihin sawi zui a hlawh lo," a ti a; an duh danin sawi zui a hlawh loh avang­in an fund chu Covid-19 dona atan ṭangkai taka an hman tur thu a sawi.

CLP deputy leader C Ngunlian­chunga chuan, meeting-a awm ve ngam loah CLP-te puh an nih thu sawiin, "MLA kan nih angin kan bialah theih­tawp kan chhuah. Ṭangho tur kan nih laia political advantage anga lâk tum an awm chuan a ṭha lo. Covid-19 avangin mahni bialah kan awm darh a, Congress chu committee thua kal kan ni si a, kan ṭhukhawm thei lawk lo a ni," a ti.

CLP secretary KT Rokhaw chuan, CLP Leader chu committee tur thu hrilh a nihin Assembly Secretary hnenah programme an lo siam lâwk tawh thu a hrilh tih sawiin, "Legislature party tlémtê chauh kan awm chunga CLP Leader awm lo chunga meeting neih luih hi hriatthiam a har, inngaih pawimawh lohna a ni," a ti a; CLP tel loa meeting ai chuan ṭhulh rih mai tura a ngaih thu a sawi.

Zawhna chhangin CLP member Lalrindika Ralte chuan, an meeting ṭuma a thu sawi dan speaker Lalrin­liana Sailo-in cable TV-a an kawmnaa a sawi chhuah chu a famkim lo nia sawiin, "CM Relief Fund-te MLA-te sem turin ka ti tawp a ni lo. Minister-te'n CM Relief Fund an sem avangin MLA-te pawhin kan bialah mamawh an tam avangin sem ve ka rawt mai a ni," a ti.

- Zodintluanga

- Zodintluanga

- KT Rokhaw

- Lalrindika Ralte