AR-in chhuahsan kim an tum lo; an insawn hun tur hriat theih a la ni lo
Assam Rifle-te chuan Aizawl khawpui chhunga an hmun aṭanga Zokhawsanga an insawn hunah pawh chhuahsan loh tumlai an nei. Hetihlai hian Assam Rifle-te an insawn chhuah vek hun tur hi hriat a la ni lo.
Vanglaini thu dawn danin, Assam Rifle-ten Aizawla an hmun an chhuahsan turah hian memorandum of understanding (MoU) duan chhin a ni a, Mizoram sorkar leh Assam Rifle lamin duhdan an neihte MoU-ah hian tarlan ve ve a ni.
Draft MoU hi Ministry of Home Affairs (MHA)-ah thawn a ni a, anni hian ṭha an ti a nih chuan MoU hi ziah a ni ang. MoU hi MHA leh Mizoram sorkar ziah tur a ni.
Assam Rifle-te hian insawn chhuak tur chuan kum 2 leh a chanve vel mamawhin an inhria nia thudawn a ni. Chutah pawh MoU-a Mizoram sorkar tih tura tarlante tihhlawhtlin vek a ngai thung.
Aizawl khawpuia an hmun zawng zawng chhuahsan vek loh Assam Rifle-te hian ṭha an ti a, chhuahsan loh an tumlai chu quarter guard leh loch house-te an ni. Lammual bula an sikul pawh Zokhawsangah sikul din a nih hma chuan chhuahsan loh an tum.
Assam Rifle-te hian Zokhawsang panna kawng chu ṭha tawk loa an hriat bakah, insawn phei vek turin tui leh power supply an mamawh khawp sorkarin a ruahman sak loah an ngai a, hengte hi Mizoram sorkarin a chinfel sak loh chuan insawn vek chi-ah an ngai lo nia thu dawn a ni.
Tarlan tawh angin, Zokhawsang hmuna ram neitute chuan an feh dawnin Assam Rifle hmun an paltlang ṭhin a, eng chen nge an hman theih dawn hriat a ni lo. Assam Rifle-te an insawn chhuah chuan an hman chhunzawm theih a rinawm lo.
Zokhawsang hmuna ram neitute Assam Rifle hmun paltlang khera an feh a ngaihna chhan chu Assam Rifle hmun hela an huan/lo panna kawng a chhiat lutuk vang a ni.