AR-in media conclave buatsaih

Assam Rifle-te chuan nimin khan 23rd Sector Headquarter, Khatla-ah media conclave an buatsaih a, an hmalakna leh hmachhawp hrang hrangte thuthar thehdarhtute an hrilhfiah.

Assam Rifle hotute chuan mipui, a bik takin ramri hrula chengte tan theihtawp chhuaha hma an lak ṭhin thu sawiin, "Central lam aṭanga sum kan dawn hmangin civic action programme hnuaiah kawng hrang hrangin mipuite tan hma kan la ṭhin," a ti.

AR hotute sawi danin, kum 2021-2022 leh 2022-2023 chhung khan national intergration tour ṭum 1 an buatsaih a, sports lama hmasawnna lam hi ṭum 5, career guidance ṭum 1, medical camp ṭum 9, hmeichhe tihhmasawnna lam ṭum 2, hmasawnna lam kaihhnawih ṭum 2, mipui mamawh semna hun ṭum 2 leh vocational training ṭum 2 an buatsaih a ni.

Kum 2023-2024 chhung hian national intergration tour ṭum 3, sports lam hmasawnna lam chi ṭum 3, career guidance ṭum 3, drugs awareness ṭum 3, hmeichhe tihhmasawnna lam ṭum 3 leh Hindi inzirtirna programme ṭum 3 buatsaih an tum.