A mamawhte tan ṭanpuina cheng nuai 2 kan pe dawn - MPCC President

Mizoram Pradesh Congress Committee (MPCC) chuan nimin khan Congress Bhavan-ah an manifesto no. 1 'Ṭang Puihna' tih zirhona hun an buatsaih a, MPCC president Lalsawta chuan a mamawhte tan ṭanpuina cheng nuai 2 an pek dawn thu a sawi.

Lalsawta chuan, an party manifesto no. 1 chung­chang hi sawifiahin, "Eizawnna kawng hrang hrangah a mamawhte tan ṭanpuina cheng nuai 2 kan pe dawn. Chhungkaw mala ṭanpuina pek bakah kuthnathawktute leh kawng hrang hrang hlawhtlin tuma beitute hnenah sorkarin an mamawh inṭawm tur thil a tih sak dawn," a ti.

MPCC President sawi danin, mamawh inṭawm tur thil - kawng siamna, tui lakna, khawl leina leh society-ten an mamawh ang chi-ah phei chuan cheng vaibelchhe têl thlengin sorkarin an mamawhna zawnah ṭanpuina a pe dawn a ni.

Sem policy nena a dang­lamna chu, a ma­mawh leh hlawhtling ngei tura thawktute hnenah chauh 'Ṭang Puihna' hi pek tur a nih thu a sawi bawk.

Budget kalphung Planning Commission hunlai nen a danglam tawh tih sawiin Lalsawta chuan, "Sum kan enkawl thiam phawt chuan Congress party sorkar lai pawh khan a ṭulna apianga hman theih turin kum khatah NEDP hnuaiah cheng vbc. 1,000 zet kan dah thei a ni," a ti.

MPCC President chuan NITI Ayog hnuaiah chuan kan chanvo, kan state budget hi ruahmanna fel tak neia kan enkawl phawt chuan Mizoram mipuite chhanchhuahna tura ruahmanna an siamte chu harsatna awm loh thu leh an ti hlawhtling thei tih hrechiangtu a nih thu a sawi.

Sorkar kal tawhah thlarau MR ṭhahnem tak an umbo thu sawiin, "Thlarau MR umbo avangin kum khatah sorkarin cheng nuai 4,900 zet kan humhim thei a ni," a ti.