Hmarchhaka Covid-19 vei tamna ber Mizoram; Cchiaina tur a awm rih lo - Health Minister

Nimin khan Health & Family Welfare minister Dr R Lalthangliana kaih­hruaiin Secretariat conference hall-ah sorkar hotute'n Mizorama Covid-19 dinhmun an thlirho a; India hmarchhak state pariat zingah Mizoram chu Covid-19 positive tam berna a nih mek thu tarlan a ni.

Dr R Lalthangliana chuan, Mizoramah hun engemawchen Covid-19 hri vei thar an awm tawh loh hnuah April, 2023 aṭang khan an awm thar leh tih a sawi a, "Tun din­hmunah phei chuan hmarchhak state pariat zinga positive case nei tam ber kan ni a, hengte hi awareness kan neih ṭhat zara kan in test ṭhat vangte pawh niin a hriat," a ti.

Mipuite leh official-te tan pawh chiaina tur thil a la awm rih lo nia a lan thu sawiin Health Minister chuan, "Hetihrual hian kan hun tawn tawhte aṭangin kan fimkhur chuan kan inveng thei tih a hriat," a ti a, hripui laka invennate ngaihpawimawh thar leh a, engemaw thleng palh theih laka lo inruahman lâwk a ṭul thu a sawi.

Ṭhukhawm chuan, hmalam hun hriat lâwk a nih loh avang leh thil lo thleng leh thei turah damlote enkawl dan tur leh a hmachhawn tura lo inruahman dan tur siam ṭha an ti a, mawhphurhna hrang hrang an insem nghal.

Damdawi leh hripui dona hmanrua neih mekte dinhmun zirchiana, a ṭul anga ruahmanna siam an rêl a; puipunna hmunah hmaituamna (mask) vuah ṭha tura mipui inzirtir leh ṭul tih a ni.

IDSP tarlan danin, April 2023 khan Mizo­ramah Covid-19 positive mi 82 hmuh chhuah a ni a; Aizawl district-ah 75, Kolasib district-ah pathum, Serchhip leh Khawzawl district-ah pahnih ve ve an ni.

May 1, Thawhṭanni khan Covid-19 positive Aizawl district-ah mi 18, Kolasib district-ah mi pakua leh Serchhip district-ah mi pasarih hmuh chhuah niin, an vaiin 34 an ni.

April, 2023 chhung khan hri vei mi 82 an awm a, hri veite hi tualchhunga hri kai nia hriat vek an ni. An zingah hian naupang kum 15 hnuai lam leh kum upa lam an tam. Omicron variant chi thum – XBB.1.16.1, XBB.1.16 leh XBB.1.9.1 vei an ni. May 1, Thawhṭanni khan Covid-19 positive mi 34 hmuh chhuah an ni a, nimin zing thleng khan hri vei enkawl mek 78 an awm.

ṬHUTKHAWMA TARLAN ṬHENKHAT
▶ October 29, 2022 hnuah May 1, 2023 khan Covid-19 hri vei mi pakhat a thi a, natna khirh tak tuarsa a ni.

▶ Tunhnaia Mizorama Covid-19 positive hmuh tharte hi symptom nei deuh vek an ni.

▶ Zin chhuahna (travel history) nei an awm lo a, tualchhunga hri kai nia hriat vek an ni.

▶ Hri kai hmuh thar zingah naupang kum 15 hnuai lam leh kum upa lam an tam.

▶ Covid-19 vaccine hi sorkar laipuiin a thlawnin a pe tawh dawn lo a, Mizoram sorkarin a mamawh angte a lei zel a ngai tawh.

▶ COVISHIELD hi siam chhuah a ni tawh lo a, COVAXIN leh COVOVAX vaccine hman a ni tawh thung.

▶ RT-PCR test kit leh Covid-19 hri vei na zualte enkawlna tur damdawi man to chite a ṭul anga lei turin NHM in ruahmanna an siam tawh.

▶ ZMC-ah Covid-19 hri vei damlote enkawlna tur ICU khum panga leh ward pakhat (khum 10) zuah reng a ni.

▶ Tun dinhmunah ICU leh ward-ah damlo pakhat ve ve enkawl mek an ni a, ICU leh ward-te hi a ṭul anga tih len theih tura ruahman a ni.

▶ District hospital zawng zawngah doctor leh thawktu dangte training ṭha tak pek an ni tawh.

▶ April, 2023 chhunga Covid-19 positive-teah hian omicron variant chi thum – XBB.1.16.1, XBB.1.16 leh XBB.1.9.1 hmuh a ni

▶ XBB.1.16.1 leh XBB.1.16-te hi variant thar niin, omicron variant dangte aiin inkaichhawn a awlsam zawk.

▶ XBB.1.16.1 leh XBB.1.16-te hi naupang leh kum upa lamah a thawk bik.

▶ Lower respiratory tract a thlen thlak theih avangin a danglam bik a, chutihrualin chiaina tur erawh a awm lo.