MZP-in RUSA hnathawh mekte June-a zo hman turin an ngen

MZP extended OB nimina ṭhukhawm chuan Mizoram chhunga RUSA hnuaia college hrang hranga hmasawnna hna thawh mekte dinhmun an thlir a, hmasawnna hna thawh mekte hi June, 2023 chhung ngeia zo hman vek turin hnathawktute an ngen.

MZP chuan college hrang hranga hmasawnna hnathawh chungchang hi thuneitute leh building sak hna thawktute an lo sawipui tawh tih tarlangin, "An harsatna hrang hrang leh college hrang hrang zirlaite aṭanga thu dawnte ngaihtuah a nih hnuin, RUSA fund hmanga college building sak mek, sak zawh hun tur pel tawhte hi June 2023 ral hma ngeia sak zawh vek nise kan duh," an ti.

MZP tarlan danin, RTI hmanga zawhna sorkarin a chhàn danin, RUSA fund hmanga hna thawh mekte hi March, 2023-a zawh hman tura ruahman a ni. Heng hnate hi Skyridge Construction & Consultancy Services, Aizawl leh SR Tochhawng Traders, Aizawlte’n an thawk.