KHAWTHLIR

Minister-in tlawh

Social Welfare & Tribal Affairs minister Lalrinawma chuan nimin khan Seṭhawna Jordan Centre a tlawh a, Thingdawla After Care Home kalpui dan tur leh Bilkhawthlira Eklavya Model Residential School sak mek a enfiah nghal. Jordan Centre-a thawkte chuan centre awmchilh tur doctor an mamawh thu te, mamawh zual lam khawmna tur lirthei leh centre-a enkawl laite taksa insawizawina tur khelmual an mamawh thu te an lo thlen. Jordan Centre-ah hian ruihhlo ngai mi 402 enkawl mek an ni.

Larsap ṭanpuina hlan

Lawngtlai district bawrhsap David Lalthantluanga chuan nimin khan a pisaah Governor Discretionary Grant kaltlangin Lairam Child Adoption Centre, Lairam Motherless Home leh Lawngtlai Observation Home hnenah Rs 25,000 ṭheuh a hlan.

Kawng khar dawn

Republic kawipui aṭanga Mission Veng Bazar (Lungli Road) kawng chu PWD in siamṭhat hna an thawh dawn avangin vawiin aṭanga May 10, 2023 thleng zing dar 10 aṭanga tlai dar 4 inkarah helai kawng hi khar a ni dawn a, hnathawh tibuai theia lirthei leh bungrua dah phal a nih loh thu Aizawl Traffic SP-in a tarlang.

Career Awareness Program

Information & Public Relation department leh Higher and Technical Institute of Mizoram (HATIM) ṭangkawp chuan May 1, Thawhṭanni khan Lunglei Pukpuia HATIM Campus-ah 'Career Awareness Program' an buatsaih a; UPSC preliminary leh main preparation, important books, important subjects, coaching methods, optional subject selection methods leh a dangte an sawiho.

Heroin man

May 1, Thawhṭanni zan khan Myanmar lam mi pahnih hnen aṭangin Champhai Police-te chuan New Champhai helipad bulah heroin gram 25 (hawng 2) an man a; ruihhlo kawltute chu - Lalnunmawia (25) s/o Mangneichia leh Biaktinthanga (24) s/o Suiliansanga, Haikhawl, Myanmar, tuna New Champhaia khawsa ve ve nia inchhalte an ni.

Mission Vengah zan duty kalpui ṭan

Mission Veng Security Committee chuan Mission Veng chhung a him zawk theih nan May 1, Thawhṭanni zan aṭang khan venhim hna thawktu tur security duty an dah ṭan. Thawhṭanni zan khan Mission Veng LC chairman Ramengmawia Ralte-in hlanna hun a hmang a, Security Committee member Rex Zarzoliana Vanchhawng, Aizawl SP-in duty turte hriat tur pawimawh leh fuihna thu a sawi. Mission Veng a him zawk theih nan security agency aṭangin zan tin dar 10 aṭanga a tuk zing dar 6 thlengin mi pali an duty dawn a, veng chhungah an kal kual ṭhin dawn a ni.