Senram Zauah FOCUS hnuaiah terrace siam

FOCUS project hma­laknain Serchhip district-a Hualtu khua Senram Zau-ah integrated farming system (IFS) kalpui meka chhungkua 40 thlan chhuahte tan thlai chìnna tur terrace laih a ni a, thlai chawmna tur tui dahkhawlna tuizem litre 1,50,000 leh tuizem tê pakua siam mek a ni.

Sorkar thuchhuah tarlan danin, chhungkaw 40 hnenah hian lei tih ṭhatna atan chinai thi (slaked lime) leh dhaicha (green manuring crop) bakah, kumin fur laia chìn tur tomato chi ṭha pek an ni a, a chìn dan pawh KVK mithiamten an zirtir a ni. Tomato an seng zawhah thlasik thlai - changkha, bawrhsaiabe leh bean-te chìn tir leh an ni ang.

Heng chhungkaw thlan bik 40-te hi FOCUS hnuai aṭangin ar, vawk leh kel vulh turte pek an ni leh dawn.