Endik tharte'n hripui an kai lo

Zoram Medical College (ZMC) Covid-19 Laboratory-ah nimin khan mi pahnihte swab sample endik a ni a, coronavirus an kai lo ve ve tih finfiah a ni. May 19, Thawhlehnia mi pakuate sample endik pawh hripui lakah an fihlîm vek bawk.

State Referral Hospital (SRH)-ah nimin khan Covid-19 vei rinhlelh thilah mi pakhat dah luh leh a ni a, nimin vek khan a swab sample lak nghal ni mah se, vawiinah endik a ni ang. SRH-ah hian rinhlelh thila dah luh (admit) tawh zawng zawng chu mi 62 an ni.

SRH chuan Covid-19 hripui léng mekah uluk zawka damlote enkawl an nih theih nan ward awm dan an tidanglam a, SARI Ward leh Make Shift ICU Ward awm hrang ṭhin chu ward pakhatah chhûn fin a ni. Thawhlehni tlai dar 5 leh nimin tlai dar 5 inkarah khan Mizoram luhna hrang hrangah mi 711 enfiah (screen) an ni a; Rapid Antibody Test (RAT) hmanga endik mi 38, RT-PCR test tih mi pali, quarantine centre-a dah luh thar mi 38 leh mahni ina khung hran (home quarantine) thar mi 341 an awm bawk.