KHAWTHLIR
Thisen pe
NSS State Office leh AVBD ruahman angin nimin khan Aizawl Civil Hospital-ah NSS volunteer mi 37-te'n thisen unit 37 an pe a, mipa 30 leh hmeichhia pasarih an ni a; Mizoram University aṭangin mi 22, Govt. Aizawl College aṭangin mi paruk, Central Higher Secondary School aṭangin mi pakua an ni. PYD (NEI) Siaha Bial pawhin Siaha District Hospital tan unit 32 an pe a, petute mipa 26 leh hmeichhia paruk an ni.
Motor insúah thi
May 19, Thawhlehni tlai dar 5:30 vel khan Sairang lam pana tlân truck AS-01 LC-4974 leh Aizawl lam pana tlân taxi MZ-01 E-4904 te Rangvamualah an insú a, taxi-a chuang Lalhuaisena (65) f/o Siamṭhakima, Ramhlun Vengthar chu Aizawl Civil Hospital casualty thlenpui a nih hnuah a hliam tuar loin a thi. Truck khalhtu hi Sangchinthanga (25) Dawrpui Vengthar a ni a, taxi khalhtu chu Siamṭhakima (22), passenger thi ta fapa a ni.
Rs. 7,60,565 zawk
May 19, Thawhlehnia Mizoram sorkar (IPR department) thuchhuahah, Mizoram House hrang hranga tangkhang mi 113-te ei leh in man CM Relief Fund aṭanga peksak tawh zat, Rs. 7,69,565 tih chu tihsual a ni a, Rs. 7,60,565 zawk a nih thu nimin khan sorkar thuchhuahin a tarlang. Heti hian, phai lama tangkhangte chaw ei man atana CM Relief Fund aṭanga sum pek tawh chu Rs. 8,38,565 a ni.
Damdawi-in endik
Sorkar laipuia Ministry of Health & Family Welfare (MoHFW) ruahmannain World Health Organisation (WHO), United Nations International Children's Emergency Fund (UNICEF) leh National Health Mission (NHM), Mizoram aiawhte'n Mizorama Covid-19 veite enkawlna tura ruahman, dedicated Covid Health Centres-te an enfiah. State Referral Hospital leh Siaha, Lawngtlai leh Serchhipa district hospital-te an lo endik tawh a; May 19 khan Champhai leh Mamita dedicated Covid-19 Health Center atana ruahman district hospital-te an endik leh a ni.