Chief Minister leh DoNER Secretary inkawm; Mizoramah economy hmasawnna turin theihna a ṭha - CM

Chief minister Zoramthanga leh nimina Aizawla lo zin DoNER secretary Lok Ranjan chu nimin khan CM Bangla-ah an inkawm. Chief Minister chuan, Mizoram chu mihring cheng an la tlem avangin ram ruak hman ṭangkai theih ala tam thu leh economy hmasawnna turin theihna (potential) a ṭhat thu DoNER Secretary a hrilh.

Zoramthanga chuan Mizoramah sumdawnna kawnga bulṭan theihna tur kawng tam takah a awm thu sawiin, "State hmasawnna atan investor ṭha tak an awm a pawimawh. Mizoram chu state dangte nen khaikhinin mihring cheng kan la tlemin ram ruak hman ṭangkai theih ala tam a, economy hmasawnna tur theihna (potential) a ṭha," a ti.

DoNER secretary Lok Ranjan chuan, sorkar laipuiin India hmar­chhaka investor-te hnuhluh a, potential-te kawhhmuh a ngai pawi­mawh tih a sawi a; Mizoramah pawh maua innghat industry tihlen leh tourism leh hospitality chu pawimawh a tihpui thu Chief Minister a hrilh.

DoNER Secretary hian edu­cation leh health sector chu investor-te'n an ngaihven hle thu Chief Minister a hrilh bawk.

He hunah hian Planning board vice chairman H Rammawi, Planning secretary Lalmalsawma Pachuau leh addl. secy Dr Lalrinchhanate an tel.