Madhya Pradesh Speaker leh a hote'n Speaker Larinliana Sailo an kawm

Madhya Pradesh State Legislative Assembly speaker Girish Gautam leh a thawhpuite chuan nimin khan zan khat riak turin Aizawl an lo thleng a, Assembly speaker Lalrinliana Sailo a pisaah an kawm.

Lalrinliana Sailo chuan, Girish Gautam leh a thawhpuiten Mizoram an rawn tlawh chu lawmawm a tih thu a sawi a, "Mizoram hi ram nuam leh ralmuang, vantlang nunphung khaihlak zawnga chetna awm lohna a ni," a ti.

Girish Gautam pawhin thu sawiin, India ram chu hnam ziarang leh ṭawng hrang tam tak awmna ni mah se, mi tinte chu India leilung fate vek an nih thu a sawi a, "Mizoram inthlan hrang hrangah vote thlaktu ṭhahnem tak an awm ṭhin hi a entawntlak hle a, Madhya Pradesh pawhin kumin kumtawpah Mizoram ruala inthlanpui kan hmachhawn ve dawn," a ti a, tluang taka mipuiten roreltu an thlan theih nan duhsakna a hlan nghal.

Madhya Pradesh sorkar aiawhte hian hmarchhak state pali - Tripura, Mizoram, Assam leh Manipur-te an tlawh dawn a; Mizoram Legislative Assembly hnuaia financial committee hrang hrang - Public Accounts Committee (PAC), Estimates Committee leh Committee on Public Undertaking (COPU)-te hnathawh dan leh paperless assembly E-Vidhan kalpui dante an zirchiang dawn a ni.