Lalduhoma'n a thutiam a tihlawhtling lo - MNF Media & Publicity dept.

MNF Media & Publicity dept. hotute chuan nimin khan Aizawl Press Club-ah thuthar thehdarhtute kawmin, Serchhip bialtu MLA Lalduhoma'n a bial mipuite a bum nasa hle niin an sawi.

MNF Media & Publicity general secretary VL Kross­hnehzova chuan, April 28, 2023 khan Thenzawlah kalin, ZPM leader Lalduh­oma, MLA hma­lakna hrang hrangte an zirchian thu sawiin, "Inthlan hmaa mipui hmaa a thutiamte a tihlawhtling em tihte kan enfiah a ni," a ti.

Serchhip MLA ni leh tura by-election campaign laiin Lalduhoma'n Then­zawl mipui tan kawng hrang hrangin hmalakna tura intiamna a nei tih sawiin VL Krosshnehzova chuan, "MLA a lo nih leh takah hian a intiamnate hi tihhlawhtlin a nei mumal lo," a ti a, tihlawhtling tura hmalakna pawh a nei lo niin a sawi.

VL Krosshnehzova chuan April 10, 2021 khan MPF Joint Local Forum, Thenzawl buatsaihin by-election denchhenin joint platform buatsaih a nih thu sawiin, "Hemi ṭum hian Pu Lalduhoma chuan Thenzawl leh a chhehvel tana hmalakna turte a puang a ni," a ti.

MNF Media-te chuan, Thenzawl bik an zirchiannaah Lalduhoma hian a bial mipuite dawt a hrilh nasa hle tih an hmuh chhuah thu sawiin, "A thusawiah 'kan sorkar chuan, ka ti a lawm' tih sawi rik a awm. 'Min thlan tlin chuan' tiin a sawi," a ti a, Lalduhoma'n a bial mipui a bum duh chu mak an tih thu an sawi.

Mahni bial mipuite pawh dawta bum duh kutah Zoram dah ngam a ni lul lo tih hi Zoram mipuiin hria se an duh thu sawiin MNF Media chuan, "Chhuanlam siama phat mawina zawng loin a bial hi a ngaihsak loa, dawtin nasa takin a bum tih pawm se la, awihawm taka dawt a sawi ṭhin hi sim tawh turin thurâwn kan pe a ni," an ti.

MNF Media-in Duhoma thusawi leh an zirchianna an tarlante

1. 'Private company nen, government organisation ka dawr fel tawh a, agreement kan sign nghal mai dawn a ni. Handloom chungchangah hian MLA ka tlin leh phawt chuan rei lote chhungin, he kalphung thar hi ka siam sak thei che u a ni, tih hi ka puang duh a ni' tiin a sawi. Thenzawl-a handloom hruaitu ṭhenkhat leh heti lama eizawngte an kawm kual nual a, an bialtu MLA hian private company emaw government organisation emaw agreement sign pui emaw a neih an hre lo. Handloom chungchangah an Bialtu MLA hian eng hmalakna mah a neih an hriat loh thu an sawi a ni.

2. 'Thenzawl hian college a mamawh ve tawh a ni. Tunah hian min hmui turte pawh kan be fel tawh a, kan sawiho nual tawh a, tun aṭanga rei loteah hian College nei turin hma kan la chho tawh dawn a ni,” tiin a sawi. He thilah pawh hian hmalakna a nei lo. Lalduhoma hian a sawi rik hma daih khan Thenzawl hian college an awh em avangin Vantawng Group YMA-in engemaw chen hma an lo la tawh a, hripui leng avang leh chhan dang avangin YMA hmalakna hi a zuzi ta deuh rih a ni. Hei bak hi Thenzawl-in College an neih theihna tura hmalakna a awm lo a ni.

3. 'Vanva Dam khi kan enkawl ṭha dawn a, a hmunah ka han en tawh a, a ṭhing ṭhuap mai a, khi khi kan khuah belh ang a, a ko khi tlemin kan tisang ang. Thenzawl Water Supply Scheme a nih bakah a thlang lawkah khian maudarh zau a awm a, maudarh ram khian an huana tui lak nan an hmang thei dawn a ni,' tiin a sawi. Hei pawh hi hmalakna pakhatmah a nei lo.

4. 'Ultrasound hi sorkarin min tihsak thei dawn lo a nih chuan MLA fund aṭangin kan ti nghal ang'' a ti. Thenzawl CHC hi April 28, 2023 khan an tlawh a, ultrasound hi an Bialtu MLA hian tun thlengin a la dah lo a ni.

5. 'Lau lui project hi puitham tak tur a ni a, kan cheimawi anga sangha kan dah ang a, tichuan kum tin fish festival, sangha kût kan hmang ṭhin dawn a ni. A kamah hian chawlhbuk nuam tak tak kan sa ang, tourism nasa takin hei hian a siam ṭha bawk dawn a ni,' tiin a sawi a, engmah hmalakna a nei zui lo.

6. 'Khawpui pakhat, nuai 10 vel awm theihna na na hi chu min tihsak theitu tur khawvelah hian min donate sak thei tur hi hmuh theih hi ka inzuam em em a ni,' tih a sawi chungchangah hma a lakna âwm hriat a ni lo.