Economy-a hausakna siam turin bamboo development a pawimawh - Chief Minister

Chief minister Zoramthanga hoin nimin khan CMO Cabinet meeting room-ah Horticulture department hotute an ṭhukhawm. Chief Minister chuan, "Chaw leh a hmeha intodelh bakah, economy hlângkai tura hausakna siam turin bamboo development a pawimawh," a ti.

CM Zoramthanga chuan, Covid-19 chu khawvel ram hrang hrang economy-in a tuar tih sawiin, "Mizoram pawhin kan tuar ve a, hemi aṭanga intungding ṭha leh turin kan state-ah chuan primary sector hi mi tam ber eizawnna a nih angin awlsam zawka intungding leh turin theihna kan nei a ni," tiin a sawi.

Zoramthanga chuan, "Sorkar laipuia innghat loa economy intodelh siam tura theihna kan neih chu kan ram leilung hman ṭangkai a ni," tiin, leilung nghêng (land base)-a eizawnna tihhmasawn a pawimawh thu a sawi a; chaw leh chawhmeha intodelh te, ei leh bar leh sum leh pai dinhmun siamṭha turin bamboo development (mau tih­hmasawn) a pawimawh thu a sawi a ni.

Meeting-ah hian kum 2019-20 chhunga SEDP hnuaia Bamboo Development Board hmalakte an thlirho a; National Bamboo Mission hnuaia action plan siam te, kut hnathawktute'n thlai thar rang chi an neih theih dan tur te, Mission for Integrated Development of Horticulture hnuaia hmalaknate leh department mamawh hrang hrangte an sawiho.

Ṭhutkhawmah hian Horticulture Development Board vice chairman Dr F Lalnunmawia, MLA, Bamboo Development Board vice chairman Dr K Pachhunga, MLA, Horticulture secretary JC Ramthanga, director Dr Elizabeth Saipari leh officer dangte an tel a ni.