Ram pum huap lawmman dawngtute chawimawi

Lunglei High Powered Committee chuan nimin khan an conference hall-ah tun hnaia Lunglei district-in hnathawh ṭhat avanga India ram pum huap chawimawina pathum - Subhash Chandra Bose Aapda Prabandhan Puraskar 2023, Best Police Station of Mizoram 2022, leh National Water Warrior dawngte lawmpuina hun an hmang a, thuchei leh pawisa an hlan.

HPC vice chairman Lawmawma Tochhawng, MLA chuan Lunglei district aṭanga ram pum huap chawimawina dawng thei mi eng emaw zat an nei chu lawmawm a tih thu a sawi a, "Kan hnathawhte leh khawtlang hmasawnna tura kan beihnate kan inhriatpuia kanin fuih phur tlân ṭhin a ṭul takzet a ni," a ti.

Chawimawina dawngtute chu Lunglei Police Station, Lunglei Fire Station leh Sairep VCP-te an ni a; Lunglei PS hian Ministry of Home Affairs in Annual Ranking of Police Station 2022 a neihah Best Police Station of Mizoram 2022 an dawng a ni.

Lunglei Fire Station hian kângmei vèn ṭhat lawmman Subash Chandra Bose Aapda Prabandhan Puraskar 2023 Award an dawng a; Sairep VCP HS Lalawmpuii chuan India rama hmeichhiate zinga faina, tuihna humhalh leh water supply system enkawlnaa thawkṭha lawmman Water Warrior Award a dawng bawk.