KHAWTHLIR

Chetlak dan tur zirtir

Lunglei District Disaster Management Authority chuan nimin khan Convention Centre-ah ni hnih awh tur Capacity Building Training of Disaster Management & Rehabilitation First Responders an buatsaih a, bawrhsap Ramdinliani'n a hmanpui. Training-ah hian district executive force, 2nd Bn. MAP, 3NH Assam Rifles, 184 Bn. BSF, 20 Bn. BSF, Sub-Hqrs. YMA, Lunglei leh Lunglei Municipal Area chhunga branch YMA member panga ṭheuh an tel.

Kawng khar dawn

Serchhip - Thenzawl inkara Mat lei hlui zawk (bailey bridge) chu PWD-te'n May 12, 2023 aṭanga an ṭhiah dawn avang leh lei ṭhiahnaah hian kawngpui aṭanga VL Lalhmangaiha Quarry panna, Thenzawl lama Mat kam kawng chu bungraw hnuhchhuahna tur a nih avangin Serchhip SP chuan helai kawng hi khar a nih dawn thu a puang. Thupek hian hnathawh zawh hma chu a huam ang.

Hmalak dan tur sawiho

Champhai District Level Coordination Committee on Ayushman Bharat under School Health and Wellness Programme chu an chairman James Lalrinchhana, district bawrhsap hoin nimin khan DC conference hall-ah an ṭhukhawm a, hmalak dan tur hrang hrang an sawiho. School Health and Wellness Programme-te changtlung leh awlsam zawka kalpui a nih theih nan Undivided Champhai District huam chinaah nodal officer pathum an ruat nghal.

Building hawng

May 2, Thawhlehni chawhnu khan Samlukhai Health & Wellness Centre building sak thar chu bialtu MLA Prof. F Lalnunmawia'n a hawng. Prof F Lalnunmawia chuan, Health Minister leh Health department hmalaknain Mizoram hmun hrang hrangah PHC leh health sub-centre ṭhahnem tak sak thar a nih thu a sawi a, "Kan bial chhungah Samlukhai Health & Wellness Centre leh Maubuang Health Sub-Centre leh staff quarter-te sak thar a ni a, a dang pawh a tahtawla la sak ṭhat zel kan beisei a ni," a ti.